MDHning eng yaxshi talabasi – universitetimiz faxri

Mazkur tanlov “Parassat” Milliy ta’lim va innovatsiyalar markazi hamda “Yangi Qozog‘iston” Respublika innovatsion markazi tomonidan tashkil etilib, unda MDH davlatlarining iqtidorli, tashabbuskor va faol talabalari ishtirok etdilar. Tanlov davomida ishtirokchilarning akademik ko‘rsatkichlari, ilmiy-tadqiqot faoliyati, jamoat ishlaridagi faolligi, ijtimoiy loyihalardagi ishtiroki hamda yoshlar tashabbuslarini rivojlantirishga qo‘shgan hissasi har tomonlama baholandi.

 Tanlov yakunlariga ko‘ra Baltabayeva Alfiya Baxitjanovna g‘olib deb topilib, “MDHning eng yaxshi talabasi” faxriy unvoniga sazovor bo‘ldi. Diplom bilan bir qatorda unga ko‘krak nishoni va esdalik kubogi ham topshirildi. Ushbu mukofotlar uning erishgan yutuqlari va xalqaro miqyosda e’tirof etilgan muvaffaqiyatlarining yorqin ifodasidir.

Mazkur yutuq talabaning maqsadga intiluvchanligi, mehnatsevarligi va faol fuqarolik pozitsiyasining amaliy natijasidir. U ilmiy, ta’limiy va ijtimoiy loyihalarda faol ishtirok etib, o‘zining bilim va salohiyatini namoyon etish bilan birga, oliy ta’lim muassasasining nufuzini xalqaro maydonda munosib himoya qilmoqda.

Talabaning ushbu muvaffaqiyatga erishishida Rus tilshunosligi kafedrasi katta o‘qituvchisi Shagiyeva Nargis Fagimovnaning ilmiy-uslubiy rahbarligi va ko‘magi alohida ahamiyat kasb etdi. Ustozning tavsiyalari, yo‘l-yo‘riqlari va doimiy qo‘llab-quvvatlashi talabaning ilmiy hamda ijodiy salohiyatini yanada rivojlantirishga xizmat qildi.

“MDHning eng yaxshi talabasi” xalqaro tanlovidagi ushbu g‘alaba nafaqat Baltabayeva Alfiya Baxitjanovnaning shaxsiy yutug‘i, balki Gumanitar fanlar fakulteti hamda Chirchiq davlat pedagogika universitetining ilmiy salohiyati va nufuzini namoyon etuvchi muhim natija hisoblanadi. Ushbu muvaffaqiyat universitetimiz talabalarini ta’lim, ilm-fan va jamoatchilik faoliyatida yanada faol bo‘lishga, yangi marralarni zabt etishga ruhlantiradi.