PROREKTOR ENG YAXSHI IXTIROCHILAR BILAN UCHRASHDI.
Chirchiq davlat pedagogika universitetida yosh ixtirochilarni qo‘llab-quvvatlash, ularning ilmiy salohiyati va innovatsion g‘oyalarini rag‘batlantirish maqsadida tashkil etilgan “Eng yaxshi oliy ta’lim ixtirochisi” Respublika tanlovining universitet bosqichi g‘oliblari bilan uchrashuv bo‘lib o‘tdi.
Mazkur tanlov universitet rektorining 2026-yil 24-apreldagi 01-120-sonli buyrug‘i asosida tashkil etilib, talaba-yoshlarning ilmiy izlanishlari, zamonaviy yondashuvlari hamda amaliy ahamiyatga ega loyihalarini keng qo‘llab-quvvatlashga xizmat qildi.
Ilmiy ishlar va innovatsiyalar bo‘yicha prorektor Baxodir Eshchanov tanlov g‘oliblari bilan samimiy muloqot o‘tkazib, ularning ixtirolari, ilmiy ishlanmalari va kelgusidagi rejalari bilan yaqindan tanishdi. Uchrashuv davomida loyihalarni amaliyotga tatbiq etish, ilmiy izlanishlarni yanada rivojlantirish hamda innovatsion g‘oyalarni kengaytirish yuzasidan muhim tavsiya va fikrlar bildirildi.
Tanlov natijalariga ko‘ra, Jismoniy madaniyat fakulteti “Jismoniy tarbiya va sport nazariyasi va metodikasi” mutaxassisligi 2-bosqich magistranti Xonchayev Muxsinbek Muxtorovich o‘zining “Speed” nomli innovatsion loyihasi bilan faxrli 1-o‘rinni qo‘lga kiritdi. Shuningdek, Tabiiy fanlar fakulteti “Aniq va tabiiy fanlarni o‘qitish metodikasi (kimyo)” mutaxassisligi 1-bosqich magistranti Murodova Dildora Chori qizi “Mahalliy organik va noorganik polimerlar asosida ionitlar olinishi” mavzusidagi ilmiy ishlanmasi bilan 2-o‘ringa sazovor bo‘ldi.
✨ Uchrashuv davomida yosh olim va ixtirochilarning ilm-fan rivojiga qo‘shayotgan hissasi, ularning kreativ fikrlashi hamda yangi g‘oyalarni yaratishdagi intilishi alohida e’tirof etildi. Bunday tanlovlar talaba-yoshlarni ilmiy faoliyatga keng jalb etish, innovatsion muhitni shakllantirish va istiqbolli loyihalarni qo‘llab-quvvatlashda muhim ahamiyat kasb etishi ta’kidlandi.
👏 Yakunda prorektor Baxodir Eshchanov tanlov g‘oliblarini erishgan yutuqlari bilan tabriklab, ularga kelgusidagi ilmiy faoliyati va innovatsion izlanishlarida ulkan muvaffaqiyatlar tiladi.
