48 ta kitob — giyohvandlikka qarshi ma’rifat qadami

     2026-yil 20-oktabr kuni Chirchiq davlat pedagogika universitetining 4-son talabalar turar joyida Maktabgacha va boshlang‘ich ta’lim nazariyasi va amaliyoti kafedrasi tomonidan “Kafedra kuni” doirasida “Bir hayot — bir tanlov: biz sog‘lom kelajakni tanlaymiz!” mavzusida profilaktik uchrashuv va davra suhbati tashkil etildi.

     “Biz giyohvandlikka qarshimiz!” shiori ostida o‘tkazilgan tadbirda pedagogika fanlari bo‘yicha falsafa doktori Doniyorova Laylo Xudayberdiyevna hamda maktabgacha va boshlang‘ich ta’lim yo‘nalishi boshlang‘ich ta’lim (kechki) mutaxassisligi 2-bosqich magistrantlari ishtirok etib, talabalar turar joyida istiqomat qiluvchi yoshlar, jumladan, ijtimoiy himoyaga muhtoj talabalar bilan ochiq muloqot olib bordilar.

     Suhbat davomida giyohvandlik va psixotrop moddalarni iste’mol qilishning inson salomatligi, ruhiy holati va kelajagiga salbiy ta’siri, shuningdek, bu boradagi huquqiy javobgarlik masalalariga alohida e’tibor qaratildi. Talabalarga sog‘lom turmush tarziga amal qilish, zararli odatlardan yiroq bo‘lish, turli salbiy ta’sirlarga qarshi mustaqil va qat’iy pozitsiyani shakllantirish yuzasidan tavsiyalar berildi.

     Tadbirning yana bir muhim jihati — yoshlar o‘rtasida kitobxonlik madaniyatini rivojlantirishga qaratilgan tashabbus bo‘ldi. Magistrantlar tomonidan talabalar turar joyi kutubxonasiga 48 dona badiiy va ma’rifiy kitob sovg‘a qilindi. Ushbu ezgu tashabbus yoshlarning bo‘sh vaqtini mazmunli tashkil etish, kitobga bo‘lgan qiziqishini oshirish va ma’naviy dunyoqarashini boyitishga xizmat qiladi.

     Interfaol shaklda tashkil etilgan davra suhbati davomida talabalar o‘zlarini qiziqtirgan savollarga javob oldilar. Shuningdek, stressli vaziyatlarni yengib o‘tish, zararli odatlardan himoyalanish va salbiy takliflarga qat’iy ravishda “Yo‘q!” deya olish ko‘nikmalari bo‘yicha amaliy tavsiyalar bilan tanishdilar. Tadbir tashkilotchilari tomonidan faol talabalarga kitoblar ulashildi.

     Mazkur ma’rifiy uchrashuv talaba-yoshlar o‘rtasida sog‘lom turmush tarzini targ‘ib qilish, giyohvandlikning oldini olish, kitobxonlik madaniyatini yuksaltirish hamda talabalar turar joyida sog‘lom ma’naviy muhitni mustahkamlashga xizmat qildi.
Zero, sog‘lom kelajak — bugun qilingan to‘g‘ri tanlovdan boshlanadi!

Universitet Axborot xizmati