An’analarni chetlab o‘tgan ma’rifiy kecha

     Chirchiq davlat pedagogika universitetida o‘tkazilgan anjuman tarixiy roman “Yaldo kechasi” taqdimoti va roman muallifi Xayriddin Sultonov ijodiga bag‘ishlandi.

     Anjumanni rektor G‘ofurjon Isroilovich Muxamedov ochib berdi. Universitetmiz rahbari G‘ofurjon Muxamedov atoqli davlat va jamoat arbobi, taniqli adib, mohir tarjimon, O‘zbekiston Respublikasi xalq yozuvchisi Xayriddin Sultonovning xalq manfaatlari yo‘lidagi ibratli faoliyati va fidokorona mehnati haqida fikr bildirdi:
 

«Men «Yaldo kechasi»ni o‘qib tugatdim. Qodiriy bobomiz avlodlarining hayot yo‘lini angladim. Bilasizlarmi, Abdulla Qodiriyning hayot yo‘li mashaqqatlar va kurashlarda o‘tgan, faqat mehnat qilgan. Xayriddin aka ham milliy adabiyotimiz va madaniyatimiz rivojiga ulkan hissa qo‘shgan inson sifatida ham qadrli. O‘zligimizni anglamoqchi bo‘lgan ziyolilar adibning ijodiga e’tiborini qaratib kelmoqda», — dedi rektor G‘ofurjon Muxamedov.

     Ma’rifiy anjumanda filologiya fanlari doktori, professor Nurboy Jabborov so‘z olib, adibning nasriy asarlari, badiiy va hujjatli filmlarining mazmuni va navbatdagi romani “Yaldo kechasi” xususida to‘xtalib o‘tdi. 

     Anjumanda ustoz adib Xayriddin Sultonovning “Osmoni falaklarda” asari asosida suratga olingan “Osmoni falaklarda: Aviaparvozning yagona qurboni” filmi ijodkorlari taniqli kinorejissyor, O‘zbekistonda xizmat ko‘rsatgan madaniyat xodimi Jahongir Qosimov va yosh aktyor Merdan Metvaliyevlar o‘z fikr-mulohazalarini bildirdilar. Yoshlarga ibrat bo‘la oladigan zamon qahramonlari haqida har jihatdan barkamol badiiy, adabiy ekran asarlari yaratish g‘oyat muhimligini ta’kidladilar. Mazkur vazifa Xayriddin Sultonov senariylari muallifligida yaratilgan filmlarda yanada yorqin rangda ekanligini qayd etishdi.

     Anjuman davomida “Osmoni falaklarda: Aviaparvozning yagona qurboni” filmi namoyish etildi. Ushbu asar universitet jamoasida qiziqish va taassurot uyg‘otdi. 

     Ma’rifiy tadbirga kelgan mehmonlar shuningdek, Chirchiq davlat pedagogika universitetining ijodkor yoshlari faoliyati bilan yaqindan tanishdi.

✅ Universitet axborot xizmati