“Informatika va axborot texnologiyalari” fanidan Respublika fan olimpiadasining yakuniy bosqichi bo‘lib o‘tdi
Muhammad al-Xorazmiy nomidagi Toshkent axborot texnologiyalari universiteti Samarqand filialida oliy ta’lim muassasalari bitiruvchi bosqich talabalari o‘rtasida “Informatika va axborot texnologiyalari” fanidan Respublika fan olimpiadasining yakuniy bosqichi yuqori saviyada tashkil etildi.
Mazkur nufuzli tanlov mamlakatimizdagi iqtidorli va bilimdon yoshlarni aniqlash, ularning nazariy va amaliy bilimlarini sinovdan o‘tkazish hamda zamonaviy axborot texnologiyalari sohasiga bo‘lgan qiziqishini yanada oshirishga xizmat qilmoqda.
Olimpiadada respublikamizning turli hududlaridan kelgan talabalar o‘zaro bilim va tajriba almashib, dasturlash, algoritmlar, sun’iy intellekt, axborot xavfsizligi va zamonaviy raqamli texnologiyalar yo‘nalishlarida o‘z salohiyatlarini namoyish etdilar. Ishtirokchilar uchun zamonaviy kompyuter xonalari va barcha zarur texnik imkoniyatlar yaratilgani olimpiadaning shaffof va adolatli o‘tishini ta’minladi.
Olimpiadada Chirchiq davlat pedagogika universiteti Aniq fanlar fakulteti Matematika va informatika yo’nalishi 4-bosqich talabalari Jabborov Jahongir Baxtiyor o'g'li va Turobova Feruza Qudrat qizi oimpiadada faol ishtirok etdi. Talabalari o‘zlarining chuqur bilim va iqtidorlarini namoyon etdilar.
Kafedra professor-o‘qituvchilarining talabalarni dasturlash, algoritmik tafakkur, sun’iy intellekt va zamonaviy axborot texnologiyalari yo‘nalishlarida tizimli va samarali tayyorlashi o‘z ijobiy natijasini bermoqda. Hozirgi kunda kafedra yoshlarning IT sohasidagi bilim va ko‘nikmalarini rivojlantirish, ularni innovatsion fikrlashga yo‘naltirish va xalqaro talablarga mos raqobatbardosh mutaxassis sifatida shakllantirishga alohida e’tibor qaratmoqda.
Kafedradagi zamonaviy laboratoriyalar, ilmiy-amaliy ishlar va innovatsion yondashuvlar talabalarning respublika va xalqaro tanlovlarda yuqori natijalarga erishishiga mustahkam zamin yaratmoqda.
Olimpiada yakunida faol ishtirok etgan talabalar sertifikatlar va esdalik sovg‘alari bilan taqdirlandi. Bu yoshlar uchun kelgusidagi ilmiy va ijodiy izlanishlarida kuchli motivatsiya bo‘lishi shubhasiz.
Aniq fanlar fakulteti hamda Axborot texnologiyalari va sun’iy intellekt kafedrasi jamoasi barcha ishtirokchi talabalarni erishgan natijalari bilan chin dildan tabriklab, ularga kelgusidagi ilmiy izlanishlari va intellektual faoliyatlarida ulkan muvaffaqiyatlar tilaydi.