Chirchiq davlat pedagogika universitetida Tokai universiteti (Yaponiya) muhandislik maktabi vakillari bilan uchrashuv bo‘lib o‘tdi. Uchrashuvda ikki oliy ta’lim muassasasi o‘rtasida ilmiy-ta’limiy hamkorlikni rivojlantirish, qo‘shma loyihalar tashkil etish hamda innovatsion yo‘nalishlarda tajriba almashish masalalari muhokama qilindi.

Tokai universitetidan tashrif buyurgan delegatsiya tarkibiga quyidagilardan iborat:

• Yamamoto Yoshio – Muhandislik maktabi dekani, Mexanik tizimlar muhandisligi kafedrasi professori (robototexnika)

• Kinoshita Yuma – Axborot fanlari va texnologiyalari maktabi, Axborot fanlari kafedrasi professori (sun’iy intellekt)

• Utsuki Tomohiko – Muhandislik maktabi, Tibbiyot muhandisligi kafedrasi professori

• Tobe Ryoko – fakultet xalqaro bo‘limi vakili

• Yaroslava Gladysheva – Muhandislik maktabi, kansler idorasi maslahatchisi (xalqaro va Yevrosiyo ishlari)

Uchrashuv davomida Tokai universiteti muhandislik fakultetlari hamda Chirchiq davlat pedagogika universitetining Aniq fanlar fakulteti “Axborot texnologiyalari va sun’intellekt” kafedrasi o‘rtasida quyidagi istiqbolli yo‘nalishlarda hamkorlikni yo‘lga qo‘yish masalalari muhokama qilindi:

• ta’limda amaliy sun’iy intellekt texnologiyalarini joriy etish,

• ta’lim robototexnikasi va o‘quv jarayonida robot qurilmalaridan foydalanish,

• tibbiy simulyatsiya texnologiyalari,

• qo‘shma ilmiy tadqiqotlar va akademik almashinuv dasturlari.

Shuningdek, tomonlar imzolangan o‘zaro anglashuv memorandum asosida ushbu yo‘nalishlarda hamkorlikni rivojlantirish maqsadida ikki universitet o‘rtasida keyingi rejalarni ham muhokama qildilar.

Tashrif doirasida Tokai universiteti professori Yamamoto Yoshio tomonidan Aniq fanlar fakulteti professor-o‘qituvchilari, tadqiqotchilar va talabalar uchun “Tokai universitetida robototexnika va mexatronika bo‘yicha so‘nggi tadqiqot yo‘nalishlari” mavzusida ilmiy ma’ruza tashkil etildi.

Ma’ruza davomida quyidagi innovatsion tadqiqot ishlari haqida batafsil ma’lumot berildi:

1. Mobil robotlarning navigatsiya va harakatlanish qarorlarini hosil qilish tizimi – robotlarning murakkab muhitda mustaqil harakatlanishini ta’minlaydigan aqlli boshqaruv algoritmlari.

2. Tabiiy ofatlardan aziyat chekayotgan insonlarni aniqlash uchun dron texnologiyalari – qutqaruv operatsiyalarida qo‘llaniladigan uchuvchisiz uchish apparatlari yordamida odamlarni aniqlash va tezkor yordam ko‘rsatish tizimlari.

3. Obyektlarni aniqlash va ajratish robot qurilmalari – sun’iy intellekt asosida ishlovchi robot tizimlari orqali obyektlarni tanib olish va ularni avtomatik ajratish texnologiyalari.

   Mazkur uchrashuv ikki oliy ta’lim muassasasi o‘rtasida ilmiy hamkorlikni kengaytirish, yangi qo‘shma tadqiqot loyihalarini yo‘lga qo‘yish hamda talabalar va tadqiqotchilar uchun xalqaro ilmiy imkoniyatlarni oshirishga xizmat qilishi ta’kidlandi.