“Bitiruv kechasi – 2026”: Pedagogika sohasining yangi avlod mutaxassislari katta hayot sari kuzatildi

     Chirchiq davlat pedagogika universitetining marosimlar maydonida universitetning 2025–2026-o‘quv yili bitiruvchilari uchun “Bitiruv kechasi - 2026” bo‘lib o‘tdi.
     Ochiq osmon ostida, o‘zgacha shukuh bilan tashkil etilgan ushbu tantana yosh mutaxassislar hayotidagi eng hayajonli va mas’uliyatli pallalardan biriga aylanib, mamlakatimiz ta’lim tizimi uchun raqobatbardosh kadrlarning yangi avlodi yetishib chiqqanini yorqin namoyon etdi.
     Marosimda Chirchiq davlat pedagogika universiteti rektori, O‘zbekiston Respublikasi fan arbobi G‘ofurjon Muxamedov, Oʻzbekiston Respublikasi Prezidenti huzuridagi Ijtimoiy himoya milliy agentligining Toshkent viloyati boshqarmasi boshligʻi Miraziz Mirsultonov, universitet rahbariyati, professor-o‘qituvchilar, faxriy mehmonlar hamda keng jamoatchilik vakillari ishtirok etdi.
     Tadbirda so‘zga chiqqanlar aziz yoshlarni ushbu unutilmas sana bilan samimiy tabriklab, Yangi O‘zbekistonning ta’lim tizimini rivojlantirish yo‘lida ularni ulkan mas’uliyat va sharafli vazifalar kutayotganini ta’kidladilar. Shuningdek, yosh mutaxassislarning kelgusi kasbiy faoliyatida zafarlar, fidoyilik va yuksak natijalar tilab, mustaqil hayot sari dadil odimlashlariga ishonch bildirdilar.
     Tantana davomida universitetning eng faol va peshqadam talabalari, xususan, Davlat stipentdiatlari, xalqaro tanlov va ilmiy loyihalar g‘oliblari alohida e’tirof etildi.
     “Bitiruv kechasi – 2026” nafaqat talabalikning oltin davriga go‘zal yakun yasagan, balki azmu shijoatli yoshlarning serqirra ta’lim sohasidagi mustaqil va sharafli kasbiy faoliyatiga mustahkam qadam qo‘ygan tarixiy kun sifatida yodda qoldi. Oq yo‘l sizga, yangi avlod bunyodkorlari!

Universitet Axborot xizmati