CHDPU delegatsiyasi Polshada: Akademik hamkorlik yangi bosqichda

2026-yil 7-iyul kuni Chirchiq davlat pedagogika universiteti (ChDPU) delegatsiyasi Varshava universitetining taklifiga binoan xizmat safari bilan Polshaga tashrif buyurdi. Tashrif NAWA (Polsha Milliy akademik almashinuv agentligi) tomonidan moliyalashtirilayotgan “O‘zbekistonda polyak tili va madaniyatini targ‘ib qilish: nafaqat Shopen, Mitskevich va Slovatskiy” nomli yirik xalqaro loyiha doirasida amalga oshirilmoqda.

Tashrif dasturining ilk bosqichi Markaziy va Sharqiy Yevropa madaniyatlararo tadqiqotlar institutida o‘tkazilgan rasmiy uchrashuvdan boshlandi. Unda ChDPU delegatsiyasi va talabalari Varshava universitetining Amaliy lingvistika fakulteti rahbariyati, jumladan, fakultet dekani, habilitatsiya doktori Agnieszka Andrychowicz-Trojanowska hamda talabalar masalalari bo‘yicha direktor, habilitatsiya doktori Agnieszka Błaszczak bilan muzokaralar olib bordilar.

Ilm-fan va akademik almashinuv — ustuvor yo‘nalish

Uchrashuv davomida tomonlar universitetlar o‘rtasidagi hamkorlikning strategik istiqbollarini muhokama qildilar. Xususan, quyidagi masalalarga alohida e’tibor qaratildi:

• Qo‘shma ta’lim dasturlari: O‘zaro tajriba almashish va hamkorlikdagi o‘quv dasturlarini joriy etish;

• Ilmiy-tadqiqot tashabbuslari: Birgalikda ilmiy loyihalarni amalga oshirish va akademik salohiyatni oshirish;

• Akademik mobillik: Talabalar hamda professor-o‘qituvchilar uchun almashinuv dasturlarini kengaytirish;

• Yangi yo‘nalishlar: Xalqaro hamkorlikning zamonaviy va istiqbolli mexanizmlarini yo‘lga qo‘yish.

Madaniyatlararo muloqot va integratsiya

Uchrashuv ishtirokchilari mazkur loyihaning ahamiyatini yuqori baholadilar:

“Amaldagi NAWA loyihasi nafaqat polyak tili va madaniyatini chuqur o‘rganish, balki Polsha va O‘zbekiston akademik hamjamiyatlari o‘rtasida mustahkam hamda uzoq muddatli aloqalarni yo‘lga qo‘yish uchun ham noyob imkoniyat yaratadi”.

Ushbu tashrif Chirchiq davlat pedagogika universitetining xalqaro ta’lim makoniga integratsiyalashuvi, madaniyatlararo muloqotni mustahkamlash hamda ta’lim sifatini jahon standartlari darajasiga ko‘tarish yo‘lidagi muhim qadam bo‘ldi.

ChDPU Axborot xizmati