CHDPU va TU Dresden: maxsus pedagogika sohasida yangi hamkorlik istiqbollari

     Chirchiq davlat pedagogika universitetiga Germaniyaning Drezden texnika universiteti (TU Dresden) professorlari Prof. Dr. Axel Gehrmann va Dr. Peggy Germer tashrif buyurdi.

     Tashrifning dastlabki qismida xorijiy mehmonlar O‘quv ishlari bo‘yicha prorektor Doniyor Ahmadjanov bilan uchrashdilar. Muloqot davomida xalqaro aloqalarni rivojlantirish, ta’lim va ilmiy-tadqiqot sohalaridagi hamkorlikni kengaytirish hamda istiqboldagi ustuvor yo‘nalishlar yuzasidan fikr almashildi.

Shundan so‘ng, mehmonlar Pedagogika fakulteti faoliyati va Maxsus pedagogika kafedrasi qoshida tashkil etilgan zamonaviy laboratoriyalar bilan tanishdilar. Ularga laboratoriyalarning asosiy vazifalari, bo‘lajak maxsus pedagoglarni amaliy tayyorlash, alohida ta’lim ehtiyojlari bo‘lgan shaxslarni qo‘llab-quvvatlash hamda ilmiy-tadqiqot faoliyatini rivojlantirish borasida yaratilgan imkoniyatlar haqida ma’lumot berildi.

Uchrashuvda Pedagogika fakulteti dekani Jabbor Usarov, Maxsus pedagogika kafedrasi mudiri Feruza Qodirova hamda kafedraning professor-o‘qituvchilari ishtirok etdilar.

Muloqot chog‘ida ikki universitet o‘rtasida hamkorlik memorandumini imzolash, talabalar va professor-o‘qituvchilar almashinuvini yo‘lga qo‘yish, qo‘shma ilmiy-tadqiqot loyihalarini amalga oshirish hamda ilg‘or pedagogik tajribalarni o‘zaro ommalashtirish masalalari muhokama qilindi.

Mazkur tashrif Chirchiq davlat pedagogika universiteti va TU Dresden o‘rtasidagi xalqaro hamkorlikni rivojlantirish, ta’lim sifatini oshirish hamda maxsus pedagogika sohasida yangi ilmiy-amaliy tashabbuslarni amalga oshirish uchun muhim qadam bo‘lib xizmat qiladi.

Universitet Axborot xizmati