CHDPU vakillari xalqaro DLL simpoziumida ishtirok etdi

     DLL — Deutsch Lehren Lernen, ya’ni “Nemis tilini o‘qitishni o‘rganish” dasturi bo‘lib, Goethe-Institut tomonidan nemis tili o‘qituvchilarining metodik va kasbiy kompetensiyalarini rivojlantirishga qaratilgan xalqaro ta’lim dasturidir.

   28-sentabr kuni O‘zbekiston davlat jahon tillari universitetida Goethe-Institut bilan xalqaro hamkorlik doirasida DLL dasturi hamkorligining 5 yilligiga bag‘ishlangan simpozium bo‘lib o‘tdi.

     Mazkur hamkorlik nemis tili ta’limida nazariya va amaliyotni uyg‘unlashtirish, zamonaviy metodikalarni joriy etish hamda bo‘lajak o‘qituvchilarda darsni rejalashtirish, kuzatish va tahlil qilish ko‘nikmalarini rivojlantirish zarurati bilan yo‘lga qo‘yilgan.

Tadbirda Chirchiq davlat pedagogika universiteti Nemis tili kafedrasi mudiri Zayniddin Sanakulov, katta o‘qituvchi Dilobar Abduxalilova hamda talaba Aminova O‘g‘iljon ishtirok etdilar. O‘qituvchilar ChDPUda DLL dasturini o‘quv jarayoniga joriy etish tajribasi bilan o‘rtoqlashdilar.

Talaba Aminova O‘g‘iljon esa PEP — Praxiserkundungsprojekt, ya’ni amaliy tadqiqot loyihasini taqdim etdi. Ushbu loyiha doirasida talabalar darsni rejalashtiradi, amalda sinab ko‘radi, kuzatadi, tahlil qiladi va natijalarini refleksiya qiladi. U DLL tanlovida muvaffaqiyatli ishtirok etdi.

Hamkorlik natijasida DLL 4 va DLL 6 modullari o‘quv jarayoniga kiritildi, talabalar PEP loyihalarini amalga oshira boshladilar, o‘qituvchilarning metodik malakasi oshdi va universitetning xalqaro ta’limiy resurslari kengaydi.

Simpozium xalqaro tajriba almashish va nemis tili ta’limini yanada rivojlantirish uchun muhim platforma bo‘ldi. 

Universitet Axborot xizmati