CHDPUda o‘zbek tiliga ehtirom: milliy g‘urur va ma’naviyat bayrami

     Chirchiq davlat pedagogika universitetida 21-oktabr — O‘zbek tili bayrami kuni munosabati bilan ma’naviy-ma’rifiy tadbir tashkil etildi. Tadbirning asosiy maqsadi tilimizga bo‘lgan hurmat va ehtiromni yanada yuksaltirish, uning boy ifoda imkoniyatlari hamda bebaho adabiy merosini yoshlar orasida keng targ‘ib etish, talabalarda davlat tiliga mas’uliyatli munosabatni shakllantirishdan iborat.

     O‘zbek tili — xalqimizning tarixiy xotirasi, milliy o‘zligi, ma’naviyati va tafakkurini o‘zida mujassam etgan bebaho qadriyatdir. Uni asrab-avaylash, rivojlantirish va kelajak avlodlarga bezavol yetkazish har birimizning muqaddas burchimizdir. tilimizning nufuzini oshirish esa, avvalo, uning boy imkoniyatlaridan to‘g‘ri foydalanish, adabiy til me’yorlariga rioya qilish, og‘zaki va yozma nutq madaniyatini yuksaltirish bilan chambarchas bog‘liq.

     Ayniqsa, bo‘lajak pedagoglar uchun tilida aniq, ravon va ta’sirchan fikr bildirish, o‘quvchilarga bilimni tushunarli yetkazish hamda nutq madaniyatiga namuna bo‘lish alohida ahamiyatga ega. Chunki o‘qituvchining nutqi nafaqat bilim berish vositasi, balki yosh avlodning ma’naviy kamoloti, tafakkuri va dunyoqarashini shakllantiruvchi muhim omildir.

     Chirchiq davlat pedagogika universitetida tilimizning nufuzini yuksaltirish, talabalarning nutq madaniyati va savodxonligini oshirish, milliy qadriyatlarimizga hurmat ruhida tarbiyalashga qaratilgan ma’naviy-ma’rifiy tashabbuslar muhim ahamiyat kasb etadi.

     O‘zbek tili bayrami barchamizga tilimizni sevish, uni e’zozlash va kundalik hayotimizda to‘g‘ri qo‘llash mas’uliyatini yana bir bor eslatadi. Zero, tilga ehtirom — millatga ehtiromdir!

Universitet Axborot xizmati