Çirçiq davlat pedagogika universitetida sportda sun’iy intellekt texnologiyalariga bağişlangan xalqaro konferensiya ötkazildi
2026-yil 13-noyabr kuni Chirchiq davlat pedagogika universiteti Jismoniy madaniyat fakultetida «Jismoniy tarbiya va sportni rivojlantirish hamda sunʼiy intellekt asosidagi innovatsiyalar» mavzusida xalqaro ilmiy-amaliy konferensiya bo‘lib o‘tdi.
Anjumanning asosiy maqsadi jismoniy tarbiya va sport sohasidagi dolzarb ilmiy muammolarni muhokama qilish, taʼlim va mashg‘ulot jarayoniga zamonaviy innovatsion yondashuvlarni joriy etish, sunʼiy intellekt hamda raqamli texnologiyalardan foydalanish imkoniyatlarini tahlil qilish, shuningdek, mahalliy va xorijiy olimlar o‘rtasidagi ilmiy hamkorlikni mustahkamlashdan iborat bo‘ldi.
Konferensiyaning ochilish marosimida so‘zga chiqqanlar jismoniy tarbiya va sportni rivojlantirishda ilm-fan yutuqlari, sunʼiy intellekt va raqamli texnologiyalarning o‘rni, sport taʼlimiga innovatsion yondashuvlarni tatbiq etish hamda xalqaro ilmiy hamkorlikni kengaytirish istiqbollari haqida fikr bildirdilar.
O‘zbek, rus va ingliz tillarida tashkil etilgan konferensiyada O‘zbekiston, Qozog‘iston, Indoneziya, Pokiston va boshqa mamlakatlarning oliy taʼlim muassasalari vakillari, professor-o‘qituvchilar, ilmiy tadqiqotchilar hamda yosh olimlar ishtirok etdi.
Anjuman doirasida sunʼiy intellekt texnologiyalarini jismoniy tarbiya va sport sohasiga tatbiq etish, kompyuter ko‘rishi va biometrik maʼlumotlar asosida sport taʼlimini takomillashtirish, kurashchilarda taktik qaror qabul qilish ko‘nikmalarini rivojlantirish, shuningdek, jismoniy tarbiya tizimini milliy va umuminsoniy qadriyatlar asosida takomillashtirish kabi yo‘nalishlarda ilmiy maʼruzalar tinglandi.
Shuningdek, jismoniy tarbiya o‘qituvchilari va murabbiylarning kasbiy salohiyatini oshirish, xokkey texnikasini o‘rgatishda sunʼiy intellekt imkoniyatlaridan foydalanish, yosh futbolchilarning akrobatik tayyorgarligini rivojlantirish, mini-voleybolni ommalashtirish hamda talabalar jismoniy faolligini oshirishga qaratilgan innovatsion yondashuvlar muhokama qilindi.
Xorijiy olim va mutaxassislarning maʼruzalari anjumanning xalqaro ilmiy muloqot maydoni sifatidagi ahamiyatini yanada oshirdi. Jumladan, Qozog‘istonning Xo‘jaybergan Jo‘banov nomidagi Aqtobe mintaqaviy universiteti, Muxtor Avezov nomidagi Janubiy Qozog‘iston universiteti, Indoneziya taʼlim universiteti, Pokistonning Haripur universiteti, shuningdek, Malayziya va Ukraina taʼlim muassasalari vakillari o‘z ilmiy izlanishlari natijalari bilan o‘rtoqlashdilar.
Konferensiya sport taʼlimiga zamonaviy texnologiyalarni keng joriy etish, ilmiy tadqiqotlar samaradorligini oshirish va xalqaro hamkorlikni rivojlantirish yo‘lidagi muhim ilmiy-amaliy muloqot maydoniga aylandi.
Universitet Axborot xizmati
Galereya