Chirchiq davlat pedagogika universitetida harbiy-vatanparvarlik yo‘nalishida yangi bosqich: ilm, innovatsiya va psixologik yondashuv uyg‘unligi
Dunyo miqyosida geosiyosiy jarayonlar keskin tus olayotgan, mafkuraviy va axborot maydonidagi raqobat tobora kuchayib borayotgan bugungi davrda yoshlarni harbiy-vatanparvarlik ruhida tarbiyalash masalasi har qachongidan ham muhim strategik vazifaga aylanmoqda. Shu nuqtayi nazardan, Chirchiq davlat pedagogika universiteti tomonidan bu yo‘nalishda amalga oshirilayotgan ishlar alohida e’tiborga loyiqdir.
Yaqinda universitetda muhim tarixiy voqea sodir bo‘ldi — O‘zbekiston Respublikasi Harbiy xavfsizlik va mudofaa universiteti bilan hamkorlik memorandumi imzolandi. Mazkur kelishuv yoshlarni harbiy-vatanparvarlik ruhida tarbiyalash tizimini yangi bosqichga olib chiqish, ilmiy-tadqiqot faoliyatini kengaytirish hamda innovatsion yondashuvlarni amaliyotga joriy etishga xizmat qiladi.
Mazkur tashrif doirasida universitetning ilg‘or ilmiy maskanlaridan biri bo‘lgan Psixokognitiv Digital laboratoriya faoliyati bilan ham yaqindan tanishildi. Laboratoriyada olib borilayotgan zamonaviy ilmiy ishlanmalar mehmonlarda katta qiziqish uyg‘otdi.
Xususan:
— inson temperamentini innovatsion usullar asosida aniqlashga qaratilgan yangi ixtiro
— universitet talabalarining psixologik portretini kompleks baholash imkonini beruvchi diagnostik test tizimi kabi ilg‘or ishlanmalar alohida e’tirof etildi.
Mazkur ilmiy yondashuvlar nafaqat pedagogik faoliyat samaradorligini oshirish, balki yoshlarning individual psixologik xususiyatlarini chuqur o‘rganish orqali ularni harbiy-vatanparvarlik ruhida ongli va maqsadli tarbiyalashda muhim ahamiyat kasb etadi.
Ushbu hamkorlik memorandumi CHDPUning nafaqat ta’lim, balki ilm-fan va innovatsiya sohalarida ham yetakchi markaz sifatida rivojlanayotganini yana bir bor tasdiqlaydi. Eng muhimi, bu tashabbuslar orqali kelajak avlodni vatanparvar, bilimli, psixologik jihatdan yetuk va zamonaviy fikrlaydigan shaxslar sifatida tarbiyalash yo‘lida mustahkam poydevor yaratilmoqda.