Fakultetlar Kengashining dastlabki majlislari bo‘lib o‘tmoqda

     Hafta davomida Chirchiq davlat pedagogika universiteti fakultetlarida yangi 2026/2027-o‘quv yili oldidan fakultetlar hayotidagi eng muhim tashkiliy, ilmiy va ma’naviy masalalarga bag‘ishlangan kengaytirilgan Kengash yig‘ilishlari o‘tkazildi. Kengashlarda o‘quv yilida amalga oshiriladigan dolzarb vazifalar belgilab olindi. Majlis davomida yangi o‘quv yilining ilk kunida “Mustaqillik darslari”ni yuqori saviyada tashkil etish hamda talabalarni munosib kutib olish choralari atroflicha muhokama qilindi.

     Yig‘ilishlarda talabalar manfaatlarini himoya qilish, ayniqsa, ehtiyojmand yoshlarni talabalar turar joylariga tizimli joylashtirish ijtimoiy adolat tamoyillariga xizmat qiladigan masalalar kun tartibidan alohida o‘rin oldi.

     Ta’lim sifatini yangi bosqichga olib chiqish maqsadida, universitetning xalqaro QS World University Rankings reytingidagi natijalari chuqur tahlil qilinib, mavjud kamchiliklarni bartaraf etish bo‘yicha uzoq muddatli ustuvor vazifalar belgilandi. Innovatsion rivojlanish va zamon talablaridan kelib chiqqan holda ta’lim jarayonini tashkil etish masalalariga e’tibor qaratildi.

Universitet Axborot xizmati