Fizika va astronomiyada raqamli transformatsiyaga bag‘ishlangan xalqaro ilmiy-amaliy anjuman tashkil etildi

2026-yil 8-oktabr kuni Chirchiq davlat pedagogika universitetida “Fizika va astronomiya tadqiqotlarida raqamli transformatsiya: sun’iy intellekt, modellashtirish va ta’limning yangi paradigmalari” mavzusidagi xalqaro ilmiy-amaliy anjuman o‘z ishini boshladi.

Anjuman Oliy ta’lim, fan va innovatsiyalar vazirining 2026-yil 16-yanvardagi 11-son buyrug‘i bilan tasdiqlangan ilmiy tadbirlar rejasi doirasida tashkil etildi. Unda mamlakatimiz oliy ta’lim muassasalari va ilmiy-tadqiqot institutlari, shuningdek, Janubiy Koreya, Qozog‘iston, Fransiya va Tojikistonning ilmiy-ta’lim muassasalari vakillari ishtirok etmoqda.

Yalpi majlisda xorijiy olimlar tomonidan fizika va astronomiya tadqiqotlari hamda ta’limning dolzarb masalalariga oid ma’ruzalar taqdim etildi. Jumladan, Janubiy Koreyaning Dankook universiteti professori Jun Young Oh kvant mexanikasi tajribalari va ekologik ta’lim masalalarini yoritdi. M. Auezov nomidagi Janubiy Qozog‘iston universiteti dotsenti Abay Tursinbayev fizikani o‘qitishda interaktiv texnologiyalar orqali talabalarning kasbiy kompetentligini rivojlantirishga bag‘ishlangan ma’ruzasi bilan qatnashdi. Fransiyalik tadqiqotchi Alexey Sergeyev esa PS J2305+3714 kvazari tasvirlari orasidagi vaqt kechikishi hamda linzalovchi galaktikaning qizilga siljishini o‘lchash va tahlil qilish bo‘yicha ilmiy ishini taqdim etdi. Shuningdek, Tojikiston Milliy fanlar akademiyasi Astrofizika instituti direktori Anvar Bo‘rizoda Mahmud anjumanda Zoom platformasi orqali ishtirok etdi.

Mahalliy olimlardan Chirchiq davlat pedagogika universiteti ilmiy ishlar va innovatsiyalar bo‘yicha prorektori, professor Baxodir Eshchanov ultratez optik jarayonlarni tadqiq qilish markazida olib borilayotgan izlanishlar, ularning natijalari va istiqbollari haqida ma’ruza qildi. Toshkent shahridagi Turin politexnika universiteti professori Davron Matrasulov kvant fani va texnologiyalarining bugungi rivoji hamda kelgusidagi ilmiy muammolarini yoritdi.

O‘zbekiston Fanlar akademiyasi Astronomiya instituti Galaktika astronomiyasi laboratoriyasi mudiri Otabek Burxonov yulduz to‘dalari va zamonaviy katta ma’lumotlar bazalariga bag‘ishlangan ma’ruzasi bilan ishtirok etdi. Navoiy davlat universiteti professori Axat Axmedov molekulyar fizika va termodinamika ta’limida sun’iy intellekt imkoniyatlaridan foydalanib, talabalarning kasbiy kompetentligini rivojlantirish metodikasini taqdim etdi.

Konferensiya doirasidagi sho‘ba yig‘ilishlarida quyidagi yo‘nalishlar bo‘yicha ilmiy ishlar muhokama qilinmoqda:

• fizika va astronomiyada raqamli transformatsiya, dolzarb ilmiy muammolar va innovatsion yechimlar;

• fizika va astronomiyani o‘qitishda raqamli texnologiyalar va innovatsion yondashuvlar;

• aniq va tabiiy fanlarni o‘qitishda fanlararo integratsiya va STEAM yondashuvlari.

Anjuman ilmiy tajriba almashish, tadqiqot natijalarini ta’lim amaliyoti bilan bog‘lash hamda mahalliy va xorijiy olimlar o‘rtasidagi ilmiy muloqotni rivojlantirishga qaratilgan. Sho‘ba yig‘ilishlari 9-oktabr kuni ham davom etadi.

Universitet Axborot xizmati