Ikki diplom — kasbiy kelajak sari yagona yo‘l

     2026-yil 10-sentabr kuni Chirchiq davlat pedagogika universitetining qo‘shma ta’lim dasturi (QTD) bitiruvchilariga diplom topshirishga bag‘ishlangan tantanali tadbir bo‘lib o‘tdi.
     Tantanali marosimning o‘ziga xos jihati shundaki, bitiruvchilarga Chirchiq davlat pedagogika universiteti hamda Kuleshov nomidagi Mogilev davlat universitetining ikki diplomi topshirildi. Shu tariqa bitiruvchilar ikki nufuzli oliy ta’lim muassasasining bitiruvchilariga aylandilar.
     Tadbirda Chirchiq davlat pedagogika universiteti rahbariyati o‘quv ishlari bo‘yicha prorektor Doniyor Axmadjonov boshchiligida professor-o‘qituvchilar tarkibi, qo‘shma ta’lim dasturi bitiruvchilari hamda ularning ota-onalari ishtirok etdilar. Kuleshov nomidagi Mogilev davlat universiteti rahbariyati va professor-o‘qituvchilar tarkibi universitetning birinchi prorektori Dmitriy Lavrenovich boshchiligida videokonferensiya orqali tantanali marosimda ishtirok etdilar.
     Tadbirni ochib berish jarayonida ishtirokchilar O‘zbekiston Respublikasi va Belarus Respublikasi ta’lim muassasalari o‘rtasidagi hamkorlikni mustahkamlash, talabalarga sifatli ta’lim olish, akademik hamkorlik va kasbiy rivojlanish uchun keng imkoniyatlar yaratishda qo‘shma ta’lim dasturining ahamiyatini alohida ta’kidladilar.
     Tantanali tadbirda bitiruvchilarga Kuleshov nomidagi Mogilev davlat universiteti birinchi prorektori Dmitriy Lavrenovich o‘zining samimiy tabrik va ezgu tilaklarini bildirdi. U yosh mutaxassislarni o‘qishni muvaffaqiyatli yakunlaganliklari bilan tabriklab, ularga o‘z kuchlariga ishonch, kasbiy faoliyatlarida ulkan muvaffaqiyatlar va olgan bilimlarini kelgusi faoliyatlarida munosib qo‘llashlarini tiladi.
     Shuningdek, bitiruvchilarga ChDPU qo‘shma ta’lim dasturi rahbari Irgash Tangirov va kafedra mudiri Toxir Fayziev ham o‘zlarining tabrik va ezgu tilaklarini yo‘lladilar. Notiqlar ikki diplomga ega bo‘lish bitiruvchilarning ko‘p yillik mehnati samarasi ekanligini, shuningdek, xalqaro ta’lim sohasidagi hamkorlikning samaradorligidan dalolat berishini ta’kidladilar.
     Tadbirning eng ta’sirchan lahzalaridan biri bitiruvchilarning ota-onalari so‘zga chiqqan payt bo‘ldi. Ular farzandlariga sifatli ta’lim berish, ularni qo‘llab-quvvatlash va tarbiyalash, shuningdek, xalqaro qo‘shma ta’lim dasturi doirasida tahsil olish imkoniyatini yaratib berganliklari uchun ikki oliy ta’lim muassasasi rahbariyati va professor-o‘qituvchilariga minnatdorlik bildirdilar.
      Bitiruvchilar nomidanqo‘shma ta’lim dasturi (QTD) bitiruvchisi Barno Ilhomova  so‘zga chiqib, ikki universitet rahbariyati va professor-o‘qituvchilariga ta’lim jarayoni davomida bergan bilimlari, kasbiy qo‘llab-quvvatlashlari, e’tibor va g‘amxo‘rliklari uchun samimiy minnatdorlik bildirdi.
     Tantanali marosim nafaqat bitiruvchilarning o‘zlari, balki ularning oila a’zolari, ustozlari hamda qo‘shma ta’lim dasturini amalga oshirishda ishtirok etgan barcha insonlar uchun ham muhim voqeaga aylandi. Ikki diplomning qo‘lga kiritilishi ikki universitet o‘rtasidagi samarali hamkorlikning ramzi va bitiruvchilarning kasbiy faoliyat yo‘lidagi muhim yangi bosqichi bo‘ldi.
     Qo‘shma ta’lim dasturi bitiruvchilarini o‘qishni muvaffaqiyatli yakunlaganliklari va ikki diplomni qo‘lga kiritganliklari bilan samimiy muborakbod etamiz! Ularga yangi yutuqlar, kasbiy o‘sish, o‘z kuchlariga ishonch va barcha ezgu maqsadlarini muvaffaqiyatli amalga oshirishlarini tilaymiz!

Universitet Axborot xizmati