Islom sivilizatsiyasi markaziga ma’naviy-ma’rifiy tashrif
Chirchiq davlat pedagogika universiteti talaba-yoshlari poytaxtimizdagi Islom sivilizatsiyasi markaziga tashrif buyurib, yurtimizning boy tarixiy va madaniy merosi bilan yaqindan tanishdi.
Ushbu mahobatli maskanda talabalar zamonaviy ekspozitsiyalar, noyob qo‘lyozmalar hamda ajdodlarimizning islom dunyosi va ilm-fan rivojiga qo‘shgan ulkan hissasini aks ettiruvchi eksponatlar bilan tanishish imkoniyatiga ega bo‘ldi.
Talabalar ayniqsa buyuk allomalarimizning boy ilmiy merosi, ularning jahon tamaddunidagi o‘rni va bugungi kunda ushbu merosni chuqur o‘rganish bo‘yicha olib borilayotgan izlanishlardan katta taassurot oldilar.
Bunday ma’naviy-ma’rifiy sayohatlar yoshlarning tarixiy xotirasini mustahkamlash, milliy qadriyatlarimizga hurmat ruhini kuchaytirish hamda ularning intellektual va ma’naviy dunyoqarashini kengaytirishda muhim ahamiyat kasb etadi.
Universitet professor-o‘qituvchilari Markazda yaratilgan zamonaviy infratuzilma, boy ilmiy muhit va tadqiqotchilar uchun taqdim etilayotgan imkoniyatlar haqida yuqori fikr bildirdilar.
Universitet Axborot xizmati
Galereya
