Mogilev shahrida CHDPU talabalari diplomatik korpus vakillari uchrashdi
2026-yil 5-may kuni Belarus Respublikasining Mogilev shahrida O‘zbekiston Respublikasi fuqarolari bo‘lgan talabalar bilan O‘zbekiston Respublikasining Belarus Respublikasidagi diplomatik missiyasi vakillari uchrashuvi bo‘lib o‘tdi.
Tadbirda diplomatik missiya maslahatchisi Alisher Mamajonovich Babayev, O‘zbekiston yoshlarining huquq va manfaatlarini himoya qilish Butunjahon assotsiatsiyasining Belarus Respublikasidagi vakili Sohiba Qahramonovna Goibnazarova hamda A.A. Kuleshov nomidagi Mogilyov davlat universitetining o'zbekistonlik talabalari ishtirok etdi.
Uchrashuv ochiq muloqot shaklida tashkil etilib, unda axborot chiqishlari hamda savol-javob sessiyasi o‘tkazildi. Tadbir davomida diplomatik missiya vakillari ta’lim olish va keyingi ish bilan ta’minlanish imkoniyatlari haqida ma’lumot berib, shuningdek, Belarus Respublikasidagi O‘zbekiston Respublikasi Elchixonasining xorijdagi vatandoshlarni qo‘llab-quvvatlash borasidagi asosiy faoliyat yo‘nalishlari, jumladan konsullik-huquqiy yordam ko‘rsatish hamda ularning qonuniy huquq va manfaatlarini himoya qilish masalalariga to‘xtalib o‘tdilar.
2026/2027-o‘quv yili uchun imtiyozli grant dasturining amalga oshirilishiga alohida e’tibor qaratildi. Mazkur dastur O‘zbekiston Respublikasi fuqarolarining Belarus Respublikasi oliy ta’lim muassasalarida bakalavriat va magistratura dasturlari asosida tahsil olishlarini nazarda tutadi.
Muhokamalar davomida ishtirokchilar ta’lim jarayonini tashkil etish, hujjatlarni rasmiylashtirish tartibi, xorijiy fuqarolarning Belarus Respublikasi hududida bo‘lish shartlari, shuningdek, kelgusidagi kasbiy faoliyat istiqbollari bilan bog‘liq masalalarni ko‘rib chiqdilar. Barcha savollar yuzasidan batafsil tushuntirish va tegishli tavsiyalar berildi.
Uchrashuv yakunida diplomatik missiya vakillari mezbon mamlakat qonunchiligiga rioya qilish zarurligini alohida ta’kidlab, sifatli ta’lim olish hamda raqobatbardosh kasbiy kompetensiyalarni shakllantirish muhim ekanini qayd etdilar.
Tadbir yakunlariga ko‘ra, uchrashuvning yuqori darajadagi axborotga boyligi va amaliy ahamiyati e’tirof etildi. Ishtirokchilar tadbirga ijobiy baho berib, bo‘lib o‘tgan muloqotning konstruktiv ruhda o‘tganini ta’kidladilar.
Universitet Axborot xizmati