Oliy ta’limdan keyingi ta’lim tizimiga oid yangi Davlat ta’lim talablari tasdiqlandi
O‘zbekiston Respublikasi Prezidentining 2026-yil 26-maydagi PF-98-son Farmoni ijrosini ta’minlash maqsadida Oliy ta’lim, fan va innovatsiyalar vazirining 2026-yil 2-sentabrdagi 364-son buyrug‘i bilan oliy ta’lim tashkilotlari hamda ilmiy tashkilotlarda oliy ta’limdan keyingi ta’limga qo‘yiladigan yangi Davlat ta’lim talablari tasdiqlandi.
Mazkur hujjat bilan oliy ta’limdan keyingi ta’lim tizimida ilmiy-tadqiqot jarayonlarini tashkil etish va doktorantlarni moddiy hamda metodik jihatdan qo‘llab-quvvatlashga qaratilgan qator muhim yangiliklar joriy etilmoqda.
📌 Asosiy yangiliklar:
Oshirilgan stipendiyalar:
2027-yil uchun ustuvor ixtisosliklar bo‘yicha tayanch doktorantura va doktoranturaga qabul qilingan doktorantlarga bazaviy stipendiyaning 1,7 baravari miqdorida oshirilgan stipendiya to‘lanadi.
Ilmiy-tadqiqot faoliyatini moddiy qo‘llab-quvvatlash:
Ustuvor ixtisosliklar bo‘yicha tahsil olayotgan doktorantlarga ilmiy-tadqiqot ishlarini amalga oshirish uchun zarur asbob-uskunalarni xarid qilishga har oy bazaviy stipendiyaning 30 foizigacha bo‘lgan miqdorda qo‘shimcha mablag‘ ajratiladi. Xarid qilingan vositalar tegishli tashkilot balansiga kirim qilinadi.
Majburiy o‘quv mashg‘ulotlari:
Tayanch doktoranturaning birinchi o‘quv yilida sohaviy maxsus fanlar, ilmiy tadqiqot metodologiyasi, akademik yozish, statistika va ma’lumotlar tahlili kabi yo‘nalishlarda majburiy o‘quv mashg‘ulotlari tashkil etiladi. Mazkur mashg‘ulotlarni olib boruvchi professor-o‘qituvchilarga soatbay haq to‘lash nazarda tutilgan.
Muhim eslatma:
Yangi Davlat ta’lim talablari 2027-yilgi qabul jarayonlari, doktorantlarga ilmiy rahbarlarni biriktirish hamda stipendiyalarni to‘lash jarayonlarida belgilangan tartibda qo‘llaniladi.
Shuningdek, Oliy ta’lim, fan va innovatsiyalar vazirining 2023-yil 10-maydagi 130-son buyrug‘i o‘z kuchini yo‘qotgan deb topildi.
Hujjat nomi: O‘zbekiston Respublikasi Oliy ta’lim, fan va innovatsiyalar vazirining buyrug‘i.
Chirchiq davlat pedagogika universiteti | Ilmiy bo‘lim
Давлат таълим талаблари.pdf