Pedagogik amaliyotda yangi yondashuv: CHDPU vakili YUNESKO muloqotida ishtirok etdi

     YUNESKO hamda O‘zbekiston milliy pedagogika universiteti hamkorligida tashkil etilgan muloqotda Chirchiq davlat pedagogika universiteti vakili, Talabalar amaliyoti bo‘limi boshlig‘i Sherzod Narmataliyev ishtirok etdi.

     SmartEd loyihasi doirasida pedagogik amaliyotni takomillashtirish masalalariga bag‘ishlangan muloqotda O‘zbekiston ta’lim tizimi uchun ishlab chiqilgan, kompetensiyaviy yondashuvga asoslangan 4+2 tartibidagi pedagogik amaliyot modeli taqdim etildi.

     Mazkur model talabalarning universitetda egallagan nazariy bilimlarini maktabdagi amaliy faoliyat bilan uzviy bog‘lash, shuningdek, bo‘lajak pedagoglarning kasbiy va pedagogik ko‘nikmalarini bosqichma-bosqich shakllantirishga qaratilgan.

     Tadbir davomida pedagogik amaliyotni zamonaviy talablar asosida tashkil etish, uning samaradorligini oshirish hamda ta’lim jarayonida nazariya va amaliyot uyg‘unligini ta’minlash masalalari muhokama qilindi.

Universitet Axborot xizmati