DUAL TA’LIM — BO‘LAJAK PEDAGOGLARNING KASBIY MAHORATINI SHAKLLANTIRISHNING SAMARALI MEXANIZMI
DUAL TA’LIM — BO‘LAJAK PEDAGOGLARNING KASBIY MAHORATINI SHAKLLANTIRISHNING SAMARALI MEXANIZMI
Chirchiq davlat pedagogika universitetida pedagog kadrlar tayyorlash sifatini oshirish, nazariy bilimlarni amaliy faoliyat bilan uzviy bog‘lash hamda bitiruvchi bosqich talabalarining kasbiy kompetensiyalarini rivojlantirishga alohida e’tibor qaratilmoqda. Bu borada dual ta’lim tizimi bo‘lajak o‘qituvchilarni kasbiy faoliyatga tayyorlashning muhim ta’limiy mexanizmlaridan biri sifatida namoyon bo‘lmoqda.
Universitetning IV bosqich talabalari umumta’lim maktablari negizida tashkil etilgan dual ta’lim jarayonida muntazam ishtirok etib, o‘zlarining nazariy bilimlarini bevosita pedagogik faoliyat sharoitida sinovdan o‘tkazmoqdalar. Mazkur jarayon talabalarga maktab ta’limi muhitini yaqindan o‘rganish, o‘quvchilar bilan samarali muloqot o‘rnatish va zamonaviy darsni tashkil etishning amaliy jihatlarini egallash imkonini bermoqda.
Haftaning shanba va dushanba kunlari bo‘lajak pedagoglar maktablarda o‘quv mashg‘ulotlarini mustaqil olib borish, darsning maqsad va vazifalarini belgilash, ta’lim mazmunini izchil bayon etish, zamonaviy pedagogik texnologiyalar va interfaol metodlardan foydalanish bo‘yicha amaliy tajriba orttirmoqdalar. Shuningdek, o‘quvchilarning individual xususiyatlarini hisobga olgan holda individual va jamoaviy topshiriqlarni tashkil etish, ularning bilish faolligini rag‘batlantirish hamda o‘zlashtirish natijalarini baholash ko‘nikmalarini takomillashtirmoqdalar.
Dual ta’limning muhim pedagogik jihati shundaki, talaba ta’lim jarayonining oddiy kuzatuvchisi sifatida emas, balki bevosita pedagogik faoliyat subyekti sifatida ishtirok etadi. Darsni rejalashtirishdan tortib, uning natijalarini tahlil qilishgacha bo‘lgan bosqichlarda to‘plangan tajriba bo‘lajak o‘qituvchida kasbiy mustaqillik, mas’uliyat, pedagogik refleksiya va metodik tafakkurni shakllantirishga xizmat qiladi.
Ayniqsa, real ta’lim muhitida yuzaga keladigan turli pedagogik vaziyatlarni hal etish, o‘quvchilarning yosh va individual xususiyatlariga mos yondashuvni tanlash, ta’lim jarayonida yuzaga keladigan muammolarga maqbul yechim topish talabalarning nazariy tayyorgarligini amaliy kompetensiyalar bilan boyitadi.
Dual ta’lim doirasida faol pedagogik amaliyot olib borayotgan IV bosqich talabalari:
Kim Stepan;
Xoliqov Sunnatilla;
Saydullayeva Asel;
Kambarova Marjan;
Erkinova Mushtariy;
Avxmatxudjayeva Munisa.
Shuni alohida ta’kidlash lozimki, zamonaviy pedagogni tayyorlash jarayoni faqat auditoriyada egallangan bilimlar bilan cheklanmasligi kerak. Bo‘lajak o‘qituvchining kasbiy yetukligi uning mustaqil dars tashkil eta olishi, pedagogik vaziyatlarni to‘g‘ri baholashi, ta’lim oluvchilar bilan samarali muloqot qilishi va o‘z faoliyatini muntazam takomillashtirib borishida namoyon bo‘ladi.
Shu ma’noda, dual ta’lim nazariya va amaliyot o‘rtasidagi uzviylikni ta’minlab, talabalarning kasbiy shakllanishi, pedagogik tajriba to‘plashi va kelajakdagi mehnat faoliyatiga puxta tayyorgarlik ko‘rishida muhim ahamiyat kasb etmoqda.
Bugungi amaliy tajriba — ertangi kasbiy mahorat va sifatli ta’lim poydevoridir!
Galereya