Ta’lim va sport integratsiyasini rivojlantirishga qaratilgan xalqaro konferensiya yakunlandi

2026-yil 16–17-oktabr kunlari Chirchiq davlat pedagogika universitetida “Ommaviy jismoniy tarbiya tizimida uzluksiz ta’limning zamonaviy yondashuvlari” mavzusida xalqaro ilmiy-amaliy konferensiya bo‘lib o‘tdi.

Mazkur anjuman O‘zbekiston Respublikasi Oliy ta’lim, fan va innovatsiyalar vazirining 2026-yil 16-yanvardagi 11-son buyrug‘i bilan tasdiqlangan ilmiy va ilmiy-texnik tadbirlar rejasiga muvofiq tashkil etildi. Konferensiya maktabgacha, umumiy o‘rta, professional va oliy ta’lim tizimida faoliyat yuritayotgan professor-o‘qituvchilar, ilmiy izlanuvchilar, magistrlar hamda iqtidorli talabalar uchun ilmiy tajriba almashish va dolzarb masalalarni muhokama qilish maydoni bo‘lib xizmat qildi.

Anjumanning asosiy maqsadi ommaviy jismoniy tarbiya tizimida uzluksiz ta’limning zamonaviy integratsiyasini ta’minlash, pedagog kadrlarning kasbiy mahoratini uzluksiz rivojlantirish uchun qo‘shimcha imkoniyatlar yaratish, shuningdek, ta’lim va sport sohalarida innovatsion yondashuvlarni keng joriy etishdan iborat bo‘ldi.

Konferensiyada O‘zbekistonning yetakchi oliy ta’lim muassasalari va ilmiy tashkilotlari vakillari bilan bir qatorda Qozog‘iston, AQSH, Germaniya, Hindiston, Rossiya, Polsha va Turkiya kabi davlatlarning olimlari, professor-o‘qituvchilari hamda soha mutaxassislari ishtirok etdi. Jumladan, O‘zbekiston Respublikasi Sport vaziri o‘rinbosari Shaxrillo Mahmudov, O‘zbekiston davlat sport akademiyasi rektori Ilhomjon Tursunaliyev, O‘zbekiston davlat jismoniy tarbiya va sport universiteti rektori Rashid Matkarimov, shuningdek, Germaniyaning Kyoln shahridan professor Georgiy Korobeynikov va Hindiston vakili Jamshed Ali, Qozog‘iston Respublikasining M. Auezov nomidagi Janubiy Qozog‘iston universiteti vakili, tarix va pedagogika fakulteti dekani, tarix fanlari nomzodi, dotsent Kurmanğali Marxabatovich Urazbayev, mazkur universitetning Maktabgacha va boshlang‘ich ta’lim fakulteti dekani  Muxtar Abenovich Ermekbayev, shuningdek, AQSHning Sinsinnati shahridagi “Future Survey” kompaniyasi prezidenti, psixologiya fanlari doktori, dotsent Abdurashid Abdumannobovich Turg‘unov ham ishtirok etib, o‘z ma’ruzalari bilan qatnashdilar.

Anjuman yalpi yig‘ilishida ommaviy jismoniy tarbiya tizimida uzluksiz ta’limning zamonaviy yondashuvlari, yuqori malakali sportchilarni ko‘p yillik tayyorlash tajribasi, O‘zbekistonda sportni rivojlantirish istiqbollari, sportchilar tayyorgarligini baholashning nazariy-metodologik asoslari hamda zamonaviy sport mediasining ahamiyati kabi masalalar muhokama qilindi. Shuningdek, xalqaro ilmiy bazalarda indekslanadigan jurnallarda ilmiy maqolalarni chop etish talablari, Olimpiya va paralimpiya sport turlarida sportchilarni saralash, sport trenerlarining kasbiy faoliyati va motivatsiyasi, psixologik yordam tizimini rivojlantirishga oid ma’ruzalar tinglandi.

Konferensiya doirasida ommaviy sport va sog‘lom turmush tarzini rivojlantirish strategiyalari, jismoniy tarbiya va sportda innovatsion pedagogik texnologiyalar, milliy va xalqaro tajriba asosida xotin-qizlar sportini takomillashtirish hamda uzluksiz ta’lim-tarbiya tizimining dolzarb muammolariga bag‘ishlangan yo‘nalishlar qamrab olindi.

Muhokamalar davomida ta’lim jarayoniga zamonaviy axborot-kommunikatsiya texnologiyalarini integratsiya qilish, o‘quvchi va talabalarda sog‘lom turmush tarzini shakllantirish, jismoniy tarbiya pedagogikasida ilmiy dalillarga asoslangan metodlarni qo‘llash hamda sport ta’limining samaradorligini oshirish masalalariga alohida e’tibor qaratildi. Ishtirokchilar ilg‘or xalqaro tajribalarni o‘rganish, innovatsion ilmiy ishlanmalarni amaliyotga tatbiq etish va pedagog kadrlarning kasbiy kompetensiyalarini rivojlantirish yuzasidan fikr almashdilar.

Mazkur xalqaro ilmiy-amaliy konferensiya xorijiy va mahalliy olimlar o‘rtasida ilmiy hamkorlikni mustahkamlash, jismoniy tarbiya va sport sohasidagi dolzarb muammolarga ilmiy-amaliy yechimlar ishlab chiqish, yosh tadqiqotchilarni qo‘llab-quvvatlash hamda zamonaviy pedagogik tajribalarni ommalashtirishda muhim ahamiyat kasb etdi.

Konferensiya materiallari to‘plamida jamlangan ilmiy maqola va ma’ruzalar jismoniy tarbiya tizimini takomillashtirish, sport sohasida innovatsion yondashuvlarni rivojlantirish hamda uzluksiz ta’lim jarayonini samarali tashkil etishga xizmat qiluvchi ilmiy-uslubiy manba sifatida ahamiyatlidir.

Ushbu anjuman Chirchiq davlat pedagogika universitetining xalqaro ilmiy hamkorlikni kengaytirish, ta’lim va sport integratsiyasini rivojlantirish, pedagogik kadrlar salohiyatini oshirish hamda mamlakatimizda sog‘lom va barkamol avlodni tarbiyalashga qaratilgan faoliyatining muhim yo‘nalishlaridan biri bo‘ldi.

Universitet Axborot xizmati