Talabalar uchun yangi imkoniyatlar: kasbiy tajriba va bandlik istiqbollari

2026-yil 21-oktabr kuni Chirchiq davlat pedagogika universitetida “AKFA BUILDING MATERIALS” MChJ ishlab chiqarish bo‘limi boshlig‘i va korxona vakillari ishtirokida talabalar bilan uchrashuv bo‘lib o‘tdi.

Uchrashuv davomida korxona vakillari ishlab chiqarish faoliyati, qurilish materiallarini tayyorlash jarayonlari hamda ishlab chiqarishda qo‘llaniladigan zamonaviy texnologiyalar haqida ma’lumot berdilar. Shuningdek, ishlab chiqarish sohasidagi mehnat faoliyatining o‘ziga xos jihatlari, ish jarayonida zarur bo‘ladigan bilim va ko‘nikmalar hamda mutaxassislarga qo‘yiladigan talablar haqida so‘z yuritildi.

Muloqotning asosiy yo‘nalishlaridan biri talabalar bandligini ta’minlash va ularning kasbiy tajribasini oshirish masalalari bo‘ldi. Korxona vakillari mavjud ish o‘rinlari, mehnat faoliyatini boshlash va ishlab chiqarish muhitida amaliy tajriba orttirish imkoniyatlari yuzasidan tushuntirishlar berdilar.

Uchrashuv talabalarga korxona faoliyati, ishlab chiqarish jarayonlari va ishga joylashish istiqbollari bilan yaqindan tanishish imkonini berdi.

Mazkur muloqot universitet va ishlab chiqarish korxonalari o‘rtasidagi hamkorlikni rivojlantirish, talabalarni mehnat bozorining zamonaviy talablari bilan tanishtirish hamda yoshlarning bandligiga ko‘maklashish yo‘lidagi muhim qadamlardan biri bo‘ldi.

Universitet Axborot xizmati