“Turkiy tillarda ilmiy-qiyosiy tadqiqotlar va metodologiya” mavzusida xalqaro ilmiy-amaliy konferensiya bo‘lib o‘tdi

2026-yil 16-oktabr kuni Chirchiq davlat pedagogika universiteti hamda Xo‘ja Ahmad Yassaviy nomidagi Xalqaro qozoq-turk universiteti hamkorligida “Turkiy tillarda ilmiy-qiyosiy tadqiqotlar va metodologiya” mavzusida xalqaro ilmiy-amaliy konferensiya bo‘lib o‘tdi.

Mazkur anjuman turkiy tillarni ilmiy asosda o‘rganish, turkiy xalqlar o‘rtasidagi ilmiy-madaniy aloqalarni mustahkamlash, zamonaviy tilshunoslikning dolzarb masalalarini muhokama qilish hamda xalqaro ilmiy hamkorlikni yanada rivojlantirishga qaratildi.

Konferensiyada Turkiya, Qozog‘iston, Ozarbayjon va O‘zbekistonning yetakchi oliy ta’lim muassasalari hamda ilmiy tashkilotlari vakillari, professor-o‘qituvchilar, tadqiqotchilar va soha mutaxassislari ishtirok etdi. Xususan, Turkiya Respublikasidan Sinop universiteti professor-o‘qituvchilari Ayshegul Demir va Feliz Guven, Qozog‘iston Respublikasidagi Xo‘ja Ahmad Yassaviy nomidagi Xalqaro qozoq-turk universiteti hamda Abay nomidagi milliy pedagogika universiteti vakillari Islom Dosbol, Botako‘z Tleubekova, Yerlan Qasen, Shaxan Quttibayev va Senbek Utebekov, Ozarbayjon Respublikasidan Dunyo yosh turk yozuvchilar birligi raisi Intiqom Yashar, shuningdek, O‘zbekiston Respublikasi Fanlar akademiyasi, Qoraqalpog‘iston Respublikasi Nukus davlat pedagogika universiteti va mamlakatimizning boshqa oliy ta’lim muassasalari vakillari qatnashdi.

Anjuman davomida turkiy tillarning leksik, semantik, grammatik va qiyosiy xususiyatlari, turkiy xalqlar tili va adabiyotining o‘zaro mushtarak jihatlari, zamonaviy tilshunoslik yutuqlari, til va adabiyot ta’limining samarali metodlari, tarjimashunoslik hamda ilmiy tadqiqotlar metodologiyasiga oid masalalar yuzasidan ma’ruzalar tinglandi. Ishtirokchilar tomonidan turkiy tillarni qiyosiy o‘rganishning nazariy va amaliy jihatlari, ilmiy izlanishlarda zamonaviy yondashuvlardan foydalanish imkoniyatlari hamda ta’lim jarayoniga ilg‘or tajribalarni tatbiq etish masalalari muhokama qilindi.

Konferensiya xorijiy va mahalliy olimlar o‘rtasida ilmiy tajriba almashish, yangi tadqiqot yo‘nalishlarini belgilash, qo‘shma ilmiy loyihalar uchun hamkorlik aloqalarini rivojlantirish hamda turkiy tillar va madaniyatlarning umumiy ilmiy merosini chuqurroq o‘rganish uchun muhim maydon bo‘lib xizmat qildi.

Mazkur xalqaro ilmiy-amaliy konferensiya Chirchiq davlat pedagogika universitetining xalqaro ilmiy hamkorlikni kengaytirish, filologik tadqiqotlar sifatini oshirish va turkiy xalqlarning ilmiy-ma’naviy merosini targ‘ib etishga qaratilgan faoliyatining muhim yo‘nalishlaridan biri bo‘ldi.

Universitet Axborot xizmati