Universitetimizda talabalikka bag‘ishlov hamda ustoz va murabbiylar kuniga bag‘ishlangan tadbir o‘tkazildi
Kimyogarlar san’at saroyida Universitetimizning 5 ming nafarga yaqin birinchi bosqich talabalari uchun “Talabalikka bag‘ishlov – 2026” tantanali marosimi va “1-oktyabr — ustoz va murabbiylar kuni”ga bag‘ishlangan bayram tadbiri bo‘lib o‘tdi.
Bayram tadbiri yosh avlodga ta’lim-tarbiya berish, malakali kadrlar tayyorlash va ilm-fanni rivojlantirishga hissa qo‘shayotgan ustozlarga hurmat va minnatdorlik ifodasi bo‘ldi. Universitetning ta’lim, ilmiy va jamoat ishlarida natijalarga erishgan professor-o‘qituvchilar, shuningdek, uning kundalik faoliyatini ta’minlab kelayotgan xodimlarning mehnati munosib e’tirof etildi.
Tantanali marosimda bir guruh professor-o‘qituvchilar va xodimlar “Oliy ta’lim a’lochisi” ko‘krak nishoni, universitet rektorining tashakkurnomalari va qimmatbaho sovg‘alar bilan taqdirlandi.
Tadbir davomida “Ehtirom–2026” tanlovi g‘oliblariga ham mukofotlar topshirildi. Tanlovning "Ta’lim tashabbuskori", "Tarbiya tashabbuskori", "Ilm tashabbuskori", “Mehnat tashabbuskori" nominatsiyalari orqali pedagogik mahorat, ilmiy izlanish, tashabbuskorlik va fidoyi mehnat rag‘batlantirildi.
Talabalar va estrada san’atkorlarining chiqishlari va kuy-qo‘shiqlar tadbirga ko‘tarinki ruh bag‘ishladi.
Aziz ustoz va murabbiylar, kasb bayramingiz muborak bo‘lsin! Sizlarga mustahkam sog‘liq, oilaviy farovonlik, ilmiy-pedagogik faoliyatingizda muvaffaqiyatlar va shogirdlaringiz yutuqlaridan faxrlanib yashash baxtini tilaymiz.
Universitet Axborot xizmati
Galereya
