“DATA SCIENCE: KELAJAK KASBI” MAVZUSIDA SEMINAR TASHKIL ETILDI.

Tabiiy fanlar fakulteti Yoshlar akademiyasi lideri Boymuratova Oʻgʻiloy ishtirokida “Data Science: kelajak kasbi” mavzusida seminar tashkil etildi. Seminar davomida bugungi raqamli texnologiyalar davrida Data Science yo‘nalishining dolzarbligi, ushbu sohaning mehnat bozoridagi o‘rni hamda kelajakdagi istiqbollari haqida batafsil ma’lumotlar berildi.

Tadbirda sun’iy intellekt, ma’lumotlar tahlili, dasturlash, machine learning va zamonaviy IT yo‘nalishlarining bugungi kundagi ahamiyati haqida alohida to‘xtalib o‘tildi. Shuningdek, talabalar uchun xalqaro platformalarda o‘qish, amaliy ko‘nikmalarni rivojlantirish va IT sohasida muvaffaqiyatli faoliyat yuritish bo‘yicha tavsiyalar berildi.

Seminar jarayonida kelajak kasblariga qiziquvchi faol talabalar ishtirok etib, o‘zlarini qiziqtirgan savollarga batafsil javob oldilar. Tadbir interaktiv ruhda tashkil etilib, talabalar o‘rtasida zamonaviy kasblarga bo‘lgan qiziqishni yanada oshirishga xizmat qildi.

Mazkur seminar yoshlarning innovatsion fikrlashi, axborot texnologiyalariga bo‘lgan qiziqishi hamda zamonaviy kasblar bo‘yicha bilim va ko‘nikmalarini rivojlantirishda muhim ahamiyat kasb etdi.