"REKTOR STIPENDIYASI" TANLOVINING YAKUNIY IMTIHONLARI O'TKAZILDI.
Mazkur tanlovda universitetning 3-bosqichida tahsil olayotgan 30 nafardan ortiq talabalar ishtirok etib, 15 ga yaqin ta’lim yo‘nalishlari kesimida o‘zaro bellashdilar. Ishtirokchilar o‘z bilim, tafakkur va tayyorgarlik darajalarini namoyon etish orqali stipendiya uchun munosib nomzod ekanliklarini isbotlashga harakat qildilar.
Yakuniy imtihon jarayonlari 2 ta muhim fan — ingliz tili hamda O‘zbekistonning eng yangi tarixi fanlari asosida tashkil etildi. Ushbu fanlar bo‘yicha talabalar nafaqat nazariy bilimlari, balki mustaqil fikrlash, tahlil qilish va o‘z munosabatini aniq ifoda eta olish ko‘nikmalari orqali ham baholandilar.
Imtihonlarning shaffof, adolatli va tartibli o‘tishini ta’minlash maqsadida jarayon ishchi guruh a’zolari tomonidan doimiy nazorat qilib borildi. Har bir bosqich belgilangan tartib va mezonlar asosida tashkil etilib, ishtirokchilarga teng va xolis sharoit yaratildi. Bu esa tanlovning ochiqligi va haqqoniyligini ta’minlashda muhim omil bo‘ldi.
“Rektor stipendiyasi” tanlovi universitetda tahsil olayotgan iqtidorli yoshlarni aniqlash, ularni qo‘llab-quvvatlash va kelgusida yanada katta yutuqlarga ruhlantirishda muhim ahamiyat kasb etadi. Bunday tanlovlar talabalarning ilmiy, ma’naviy va intellektual salohiyatini ro‘yobga chiqarish, shuningdek, ularni yuksak natijalarga intilish ruhida tarbiyalashga xizmat qiladi.
Chirchiq davlat pedagogika universitetida tashkil etilgan mazkur yakuniy imtihon jarayonlari ham talabalar o‘rtasida sog‘lom raqobat muhitini shakllantirish, bilimli va salohiyatli yoshlarni rag‘batlantirish yo‘lidagi muhim qadamlardan biri bo‘ldi.
