"Ilm – insonni yuksaklikka olib boradigan yoʻldir." — Alisher Navoiy

“Maktab-labaratoriya”

“Maktab-labaratoriya”

Kategoriyalar: 
E'lonlar
Chop etilgan sana:  16 Noyabr 2026 06:43 Ko'rishlar:  33

 

Мazkur yo‘nalishda kafedra va Toshkent viloyati Chirchiq shahar Maktabgacha va maktab ta’limi bo‘limiga qarashli 21-sonli umumiy o‘rta ta’lim maktabi o‘rtasida hamkorlik shartnomasi tuzildi. Hamkorlik o‘quvchilarni pedagoglik kasbiga maqsadli yo‘naltirish, ularda kasbga qiziqish uyg‘otish hamda boshlang‘ich pedagogik bilim va ko‘nikmalarni shakllantirishga qaratilgan.

“Umumiy o‘rta ta’lim muassasalarida tashkil etiladigan pedagogik sinflar uchun kasbiy ta’lim fani o‘quv dasturi” asosida kafedra professor-o‘qituvchilari D.E. Karshiyeva va Z.M. Kabirova tomonidan mashg‘ulotlar olib borilmoqda. Ularda pedagoglik kasbining mazmuni, jamiyat taraqqiyotidagi o‘rni, o‘qituvchining kasbiy madaniyati, mas’uliyati va shaxsiy fazilatlari haqida tushunchalar berilmoqda.

“Pedagog kasbi olamida” moduli bo‘yicha mashg‘ulotlar interfaol usullar, didaktik o‘yinlar, munozaralar, esse yozish, taqdimot tayyorlash va loyiha topshiriqlari asosida tashkil etildi. Shuningdek, “teskari sinf” (flipped classroom), aralash ta’lim (blended learning) hamda raqamli texnologiyalardan foydalanishga e’tibor qaratildi.

Hamkorlikning amaliy yo‘nalishlaridan biri — “NeyroPedLab” laboratoriyasi imkoniyatlarini pedagogik tayyorgarlik bilan bog‘lashdir. Laboratoriya o‘quvchilarni neyropedagogik yondashuvlar bilan tanishtirish, diqqat, xotira, idrok va tafakkurning o‘rganish jarayonidagi ahamiyatini tushuntirish uchun amaliy maydon bo‘lib xizmat qilishi ko‘zda tutiladi. Uning imkoniyatlari asosida bo‘lajak pedagoglarda o‘quvchining individual xususiyatlarini hisobga olish, rivojlantiruvchi mashqlarni tanlash va ta’lim jarayonini qiziqarli tashkil etish haqida dastlabki tasavvurlarni shakllantirishga e’tibor qaratiladi.

Ijodiy topshiriqlar doirasida o‘quvchilar o‘qituvchilar haqida rasmlar, hikoyalar va videomateriallar tayyorlab, ularda aks ettirilgan pedagog obrazini muhokama qilmoqdalar. Ushbu faoliyat o‘qituvchi mehnatini anglash, kasb haqidagi qarashlarni boyitish va o‘z fikrini mustaqil ifodalashga yordam bermoqda.

“Maktab–laboratoriya” hamkorligi va “NeyroPedLab” laboratoriyasining amaliy imkoniyatlari o‘quvchilarning pedagoglik kasbiga qiziqishini qo‘llab-quvvatlashga xizmat qiladi. Universitet va maktab o‘rtasidagi uzviy aloqa esa kelajakdagi pedagog kadrlarni tayyorlashning dastlabki bosqichini mazmunli tashkil etish uchun zamin yaratadi.

Teglar: E'lonlar