CHDPUda ko‘zi ojiz abituriyentlar uchun kirish imtihoni o‘tkazildi

     Chirchiq davlat pedagogika universitetiga o‘qishga kirish uchun ro‘yxatdan o‘tgan 12 nafar ko‘zi ojiz abituriyent bugun maxsus komissiya ishtirokida og‘zaki savol-javob asosida kirish imtihonini topshirdi.

     Imtihon jarayonining ochiqligi, shaffofligi va adolatli o‘tishini ta’minlash maqsadida sinov ijtimoiy tarmoqlar orqali jonli efirda namoyish etildi. Unda O‘zbekiston ko‘zi ojizlar jamiyati hamda Yoshlar ishlari agentligi vakillari ham kuzatuvchi sifatida ishtirok etdi.

     Imtihon savollari ona tili va adabiyoti, tarix, biologiya hamda chet tili fanlarini qamrab oldi. Abituriyentlarning javoblari besh balli baholash tizimi asosida baholandi.

     Eslatib o‘tamiz, Hukumatning 2025 yil 13-sentabrdagi qarori bilan tasdiqlangan «Oliy ta’lim muassasalarining bakalavriatiga talabalarni o‘qishga qabul qilish tartibi to‘g‘risida»gi nizomga muvofiq, imtihonlaridan muvaffaqiyatli oʻtgan abituriyentlar Davlat komissiyasi qaroriga muvofiq oliy taʼlim tashkiloti rektorining buyrugʻi bilan tanlovsiz, qoʻshimcha davlat granti asosida talabalikka qabul qilinadi.

Universitet axborot xizmati