CHDPUNING 7 NAFAR TALABASI “MIRZO ULUG‘BEK VORISLARI” DATA SCIENCE O‘QUV KURSINI MUVAFFAQIYATLI YAKUNLADI.
“O‘zbekistonda ma’lumotlar ilmi — Data Science”
“Mirzo Ulug‘bek vorislari” 2025–2026-o‘quv yili bitiruvchilari ishtirokida konferensiya va tantanali taqdirlash marosimi bo‘lib o‘tdi.
2026-yil 7-iyul kuni Iste’dodli yoshlarni qo‘llab-quvvatlash “Ulug‘bek” jamg‘armasi, O‘zbekiston Respublikasi Raqamli texnologiyalar vazirligi, O‘zbekiston Respublikasi Oliy ta’lim, fan va innovatsiyalar vazirligi hamda Toshkent shahridagi Inha universiteti hamkorligida “Mirzo Ulug‘bek vorislari” 2025–2026-o‘quv yili bitiruvchilari ishtirokida “O‘zbekistonda ma’lumotlar ilmi — Data Science” mavzusida konferensiya o‘tkazildi. Mazkur tadbir O‘zbekiston Respublikasi Vazirlar Mahkamasining 2023-yil 19-maydagi 206-son qarori ijrosini ta’minlash doirasida amalga oshirilgan ishlar yuzasidan hisobot berish hamda o‘quv kursi bitiruvchilarini tantanali taqdirlash maqsadida tashkil etildi.
Tadbirda Iste’dodli yoshlarni qo‘llab-quvvatlash “Ulug‘bek” jamg‘armasi raisi, akademik Oqil Umurzoqovich Salimov bitiruvchilarni samimiy tabriklab, ularning kelgusidagi faoliyatiga muvaffaqiyat tiladi. Shuningdek, Raqamli texnologiyalar vaziri o‘rinbosari Rustam Karimjonov, Oliy ta’lim, fan va innovatsiyalar vaziri o‘rinbosari O‘ktam Salomov, Toshkent shahridagi Inha universiteti rektori Bobur Abdullayev hamda “Mirzo Ulug‘bek vorislari” o‘quv kurslari MChJ direktori Saidazim Shavkatov tomonidan raqamli transformatsiya, oliy ta’lim tizimini takomillashtirish, sun’iy intellekt va mehnat bozori, shuningdek, kurs mazmuni va ahamiyati yuzasidan ma’ruzalar qilindi. Ma’ruzachilar Data Science bugungi kunda bank, qishloq xo‘jaligi, tibbiyot, sanoat va boshqa sohalarda ma’lumotlarni tahlil qilish, prognozlash hamda samarali qarorlar qabul qilishda muhim ahamiyat kasb etayotganini alohida ta’kidladilar.
Innovatsion loyihalar namoyishi
Konferensiya davomida sun’iy intellekt va neyron tarmoqlar asosida yaratilgan dasturiy ta’minotlar taqdim etildi hamda 5 ta istiqbolli loyiha ishtirokchilarga tanishtirildi.
Konferensiya davomida kurs bitiruvchilari tomonidan sun’iy intellekt va neyron tarmoqlar asosida yaratilgan dasturiy ta’minotlar namoyish etilib, 5 ta istiqbolli loyiha taqdimoti o‘tkazildi. Shuningdek, United Ventures tomonidan tashkil etilgan Startup Booster akseleratsiya dasturida Markaziy Osiyodan tanlab olingan 36 ta startap orasidan munosib o‘rin egallagan “Qaqajon AI” loyihasi ham e’tirof etildi. “Startup Booster Demo Day 2026” dasturida g‘olib deb topilib, 25 000 AQSH dollari miqdoridagi grantni qo‘lga kiritgan Shahzoda Hakimova, Azizbek Eshmuminov va Ravshanbek Akbarovlar o‘z loyihalari taqdimotini o‘tkazdilar. Tadbir yakunida “Mirzo Ulug‘bek vorislari” o‘quv kursi tinglovchilari, bitiruvchilar, ma’ruzachilar va tashkilotchilar esdalik uchun suratga tushishdi.