Jismoniy tarbiya va sport ta’limi yo‘nalishida ilmiy va innovatsion faoliyatini jadallashtirishga qaratilgan Kengash o‘tkazildi

     25-aprel kuni rektor G‘ofurjon Muxamedov rahbarligida universitet Kengashining kengaytirilgan sayyor yig'ilishi bo'lib o'tdi. Yig‘ilishda Kengash a’zolari, kafedra mudirlari, yetakchi professor-o‘qituvchilar, tuzilma rahbarlari, ekspertlar va sport-jurnalistlari ishtirokida Sport pedagogikasini intensiv rivojlantirish va Jismoniy madaniyat fakultetining kasbga yo‘naltirilgan ta’lim muhitida kelajak o‘qituvchilarini tayyorlash tajribasi va istiqbollari muhokama qilindi.

     Yig‘ilishda pedagogik sport ta’limni raqamlashtirish, “Kelajak o‘qituvchisi” konsepsiyasini ta’lim amaliyotiga tatbiq etish, fakultet talabalarida yanada ijodkorlik qobiliyatini shakllantirishga qaratilgan Innovatsion ta’lim muhiti taqdimoti masalalariga bag‘ishlandi.

     Taqdimotlar orqali hozirgi raqamlashtirish davrida bo‘lajak mutaxassislarni ijodkorlikka yo‘naltirish, innovatsion ta’lim texnologiyalarni tatbiq etish borasida bir qator ijobiy ishlar namoyish etildi. Yangi texnologiyalar, raqamlashtirish va sun’iy intellektning sport-pedagog ta’limiga ta’siri, professor-o‘qituvchilarning ta’limda zamonaviy texnologiyalardan foydalanish imkoniyatlari, kafedralarning zamonaviy qiyofasi va yangicha pedagogik muhiti universitetning Jismoniy madaniyat fakulteti misolida tahlil qilindi.

     Kafedralarning mustaqil ta’lim jarayonlarida samarali foydalanish uchun mo‘ljallangan vizual materiallar, interaktiv maketlar, multimediyaviy vositalar va amaliy ko‘nikmalarni rivojlantirishga yo‘naltirilgan qo‘llanmalar namoyish etildi. Kafedralarda tashkil etilgan ko‘rgazmalarda fan-texnologiya-pedagogika mazmunini uyg‘unlashtirish orqali real ta’lim muammolariga echim topishga qaratildi. Muhokamalarda sport-jurnalistlari va chempion talabalar faol ishtirok etib, o‘zlarining amaliy tajribalari asosida taklif va mulohazalarini bildirdilar.

     Mamlakatimizda bolalar sporti, kiber sport turlari, milliy va ommaviy sport musobaqalari izchil o‘sishda davom etayotgan ayni kunlarda innovatsiyalarga asoslangan maqsadli zamonaviy ta’lim yutuqlari bilan qurollangan mutaxassislar zarurligi qayd etildi.
     
     Universitetda faoliyat olib borayotgan sport to‘garaklari faoliyati o‘rganildi. Mahalla yoshlar o‘rtasida ommaviy sport musobaqalarini tizimli tashkil etish orqali sog‘lom turmush tarzini keng targ‘ib qilish, ularni ommaviy sportga jalb etishni yangi bosqichga olib chiqish borasida qilinayotgan ishlari hisoboti tinglandi. Ta’til davrida maktab o‘quvchilari o‘rtasida sportni yanada rivojlantirish bo‘yicha chora-tadbirlar dasturi taqdim etildi.

     Sport tadbirlarida g‘olib bo‘lgan talabalar va ularning o‘qituvchilarini munosib rag‘batlantirish va chempion talabalarning faoliyatini ommalashtirish borasida ko‘rsatmalar berildi.

     Kengash yakunida Jismoniy madaniyat fakulteti professor-o‘qituvchilariga ilmiy unvonlar topshirildi va "Pedagog" futbol jamoasining xalqaro yutug‘i e’tirof etildi. 

Universitet Axborot xizmati