Xalqaro ilmiy-amaliy anjuman yuqori saviyada tashkil etildi

     2026-yil 25-may kuni Chirchiq davlat pedagogika universitetida “Yashil kimyo va barqaror rivojlanish: zamonaviy ta’lim, innovatsion usullar va kelajak o‘qituvchilarini shakllantirish istiqbollari” mavzusidagi xalqaro ilmiy-amaliy anjuman muvaffaqiyatli o‘tkazildi.

     Mazkur nufuzli xalqaro anjuman O‘zbekiston Respublikasi Oliy ta’lim, fan va innovatsiyalar vazirligining 2026-yil 16-yanvardagi 11-son buyrug‘i asosida tashkil etilib, ilm-fan, ta’lim va innovatsiyalar sohasidagi dolzarb masalalarni muhokama qilish, xalqaro ilmiy hamkorlikni rivojlantirish hamda tajriba almashish uchun muhim platforma vazifasini bajardi.

     Anjuman ishida O‘zbekiston Respublikasining yetakchi oliy ta’lim muassasalari, ilmiy-tadqiqot institutlari hamda Turkiya, Qozog‘iston, Belarus, Tojikiston va boshqa davlatlarning nufuzli universitetlari va ilmiy markazlaridan professor-o‘qituvchilar, akademiklar, fan doktorlari, doktorantlar, magistrantlar va yosh tadqiqotchilar an’anaviy hamda masofaviy (onlayn) formatda ishtirok etdilar.

     Konferensiyani Chirchiq davlat pedagogika universiteti rektori, kimyo fanlari doktori, professor, O‘zbekiston Respublikasi fan arbobi Gafurjan Israilovich Muxamedov ochib berdi. Shuningdek, tadbirda Toshkent Kimyo Texnologiyalari Instituti professori kimyo fanlari doktori prof. Abduhamid Gafurovich Maxsumov, O‘zbekiston Milliy universiteti Kimyo fakulteti professori, kimyo fanlari doktori Anvar Kabirovich Abdushukorov ishtirok etib, anjuman mavzusining dolzarbligi haqida fikr bildirdilar.

     Anjuman davomida mahalliy va xorijiy olimlar tomonidan Yashil kimyo, kimyoda barqaror rivojlanish tamoyillari va zamonaviy taʼlimda innovatsion usullar hamda kelajak oʻqituvchilarini shakllantirish istiqbollari kabi dolzarb mavzularda ilmiy ma’ruzalar taqdim etildi. Jumladan, Belarus Respublikasidan F. Skorina nomidagi GGU Fizika va axborot texnologiyalari fakulteti Radiоfizika va elektronika kafedrasi katta o‘qituvchisi V.V. Vaskevich, Tomsk politexnika universiteti (Rossiya) Kimyo va biokimyo texnologiyalari bo‘yicha tadqiqot maktabi rahbari, professor, M.E.Trusova hamda Tojikiston respublikasi yetakchi olimlari Rajabzoda Sirojiddin Ikromovich tomonidan ham ilmiy chiqishlar amalga oshirildi. Konferensiya doirasida yalpi majlis va sho‘ba yig‘ilishlari tashkil etilib, ularda:

     🔹 yashil kimyo va barqaror taraqqiyot konsepsiyalari;

     🔹 organik va biorganik kimyoning zamonaviy yutuqlari;

     🔹 polimerlar va kompozit materiallar kimyosi;

     🔹 fizikaviy va kolloid kimyoning istiqbolli yo‘nalishlari;

     🔹 analitik va noorganik kimyo sohasidagi innovatsion tadqiqotlar;

   🔹kimyo ta’limini raqamlashtirish, sun’iy intellekt va virtual laboratoriyalar asosida takomillashtirish masalalari bo‘yicha ilmiy ma’ruzalar tinglandi.

     Anjuman davomida olimlar tomonidan olib borilayotgan fundamental va amaliy tadqiqotlar natijalari taqdim etildi, ilmiy bahs-munozaralar va fikr almashuvlar tashkil etildi. 

     Konferensiya doirasida ilmiy hamkorlikni rivojlantirish, qo‘shma tadqiqotlar olib borish, akademik almashinuv dasturlarini kengaytirish hamda yosh olimlarni xalqaro ilmiy muhitga integratsiya qilish masalalari yuzasidan fikr almashildi. Mazkur anjuman ilm-fan va ta’lim integratsiyasini mustahkamlash, yashil kimyo tamoyillarini targ‘ib etish hamda barqaror rivojlanish maqsadlariga erishishda muhim ilmiy platforma bo‘lib xizmat qildi.

   Mazkur xalqaro anjuman ilm-fan va ta’lim integratsiyasini mustahkamlash, ekologik tafakkur va yashil texnologiyalarni ommalashtirish, shuningdek, zamonaviy kompetensiyalarga ega bo‘lgan kelajak o‘qituvchilarini tayyorlash yo‘lida muhim qadam bo‘ldi.

     Anjuman yakunida faol ishtirokchilar sertifikatlar bilan taqdirlandi hamda barcha mahalliy va xorijiy hamkorlarga, professor-o‘qituvchilar va tadqiqotchilarga samarali hamkorlik uchun samimiy minnatdorlik bildirildi.