Biologiya fani bo‘yicha Abu Rayhon Beruniy nomidagi birinchi Xalqaro olimpiadaga saralash
Olimpiada haqida
Oliy ta’lim tashkilotlari talabalari o‘rtasida biologiya fani bo‘yicha Abu Rayhon Beruniy nomidagi Xalqaro olimpiada tashkil etilmoqda.
Olimpiadaning asosiy maqsadi iqtidorli talabalarning intellektual va ilmiy salohiyatini ro‘yobga chiqarish, ularni biologiya faniga keng jalb etish, nazariy bilimlari va amaliy ko‘nikmalarini rivojlantirish hamda ilmiy-tadqiqot faoliyatiga yo‘naltirishdan iborat.
Shuningdek, mazkur xalqaro olimpiada Abu Rayhon Beruniyning tabiiy fanlarga oid boy ilmiy merosini yoshlar orasida keng ommalashtirishga xizmat qiladi.
CHDPU talabalari uchun saralash
Chirchiq davlat pedagogika universitetida biologiya fani bo‘yicha iqtidorli talabalar o‘rtasida oliy ta’lim tashkilotining ichki saralash bosqichi yuqori saviyada, xolis va shaffof tarzda tashkil etiladi.
Ichki saralash yakunlari bo‘yicha g‘olib bo‘lgan 4 nafar talabadan iborat jamoa jamoa rahbari bilan birga respublika saralash bosqichida ishtirok etish uchun tavsiya etiladi.
Olimpiada qanday o‘tkaziladi?
- Olimpiadaning ish tili — ingliz tili;
- xalqaro bosqich nazariy va amaliy (laboratoriya) turlaridan iborat;
- nazariy tur 4 soat davom etadi;
- amaliy tur biologiya laboratoriyalarida 4 soat davom etadi;
- har bir tur 100 ballik tizimda baholanadi;
- yakuniy maksimal natija — 200 ball.
Topshiriqlar yo‘nalishlari
Olimpiada topshiriqlari quyidagi biologik yo‘nalishlarni qamrab olishi mumkin:
- hujayra va molekulyar biologiya;
- biokimyo;
- genetika va evolyutsiya;
- mikrobiologiya;
- o‘simliklar anatomiyasi va fiziologiyasi;
- hayvonlar va odam anatomiyasi hamda fiziologiyasi;
- ekologiya;
- biosistematika;
- biotexnologiya va bioinformatika.
G‘oliblarni rag‘batlantirish
Olimpiada g‘oliblari oltin, kumush va bronza medallari hamda diplomlar bilan taqdirlanadi.
G‘olib talabalar va ularni tayyorlagan ustozlar amaldagi tartibga muvofiq rag‘batlantiriladi.
O‘zbekiston Respublikasi talabalari orasidan olimpiada g‘olibi bo‘lganlar uchun tegishli mutaxassisliklar bo‘yicha magistraturaga davlat granti asosida imtihonsiz qabul qilish yuzasidan qonunchilikda belgilangan tartibda tegishli choralar ko‘riladi.
Batafsil ma’lumot uchun
Olimpiada hamda universitet ichki saralash bosqichi bo‘yicha batafsil ma’lumot olish uchun fakultetlarning o‘quv ishlari bo‘yicha dekan o‘rinbosarlariga murojaat qilishingiz mumkin.