Olimpiada haqida

Oliy ta’lim tashkilotlari talabalari o‘rtasida kimyo fani bo‘yicha Abu Rayhon Beruniy nomidagi Xalqaro olimpiada — Abu Rayhan Biruni International Chemistry Olympiad (ABICO) tashkil etilmoqda.

Olimpiadaning asosiy maqsadi iqtidorli yoshlarning intellektual salohiyatini ro‘yobga chiqarish, ularni kimyo faniga keng jalb etish, ilmiy-tadqiqot faoliyatiga yo‘naltirish hamda Abu Rayhon Beruniyning boy ilmiy merosini ommalashtirishdan iborat.

Olimpiada ilmiy-uslubiy yondashuv, adolatlilik, ochiqlik, xolislik va barcha ishtirokchilar uchun teng imkoniyat yaratish tamoyillari asosida o‘tkaziladi.

CHDPU talabalari uchun ichki saralash

Chirchiq davlat pedagogika universitetida kimyo fani bo‘yicha iqtidorli talabalar o‘rtasida universitetning ichki saralash bosqichi tashkil etiladi.

Ichki saralash bosqichi 2026-yil 10-noyabrga qadar yuqori saviyada, xolis va shaffof tarzda o‘tkaziladi.

Saralash yakunlariga ko‘ra g‘olib bo‘lgan 4 nafar talabadan iborat jamoa jamoa rahbari bilan birga respublika saralash bosqichida ishtirok etish uchun tavsiya etiladi.

Saralash va xalqaro bosqich

O‘zbekiston Respublikasi oliy ta’lim tashkilotlari talabalari xalqaro final bosqichida ishtirok etish huquqini milliy saralash orqali qo‘lga kiritadi.

Milliy saralash ikki bosqichdan — oliy ta’lim tashkilotining ichki saralash bosqichi hamda respublika saralash bosqichidan iborat.

Respublika miqyosidagi milliy saralash bosqichi 2026-yil 20-noyabrga qadar tashkil etilishi belgilangan.

Olimpiada qanday o‘tkaziladi?

• Olimpiadaning ish tili — ingliz tili;
• olimpiada nazariy va amaliy (laboratoriya) turlaridan iborat;
• nazariy tur 4 soat davom etadi;
• amaliy tur kimyo laboratoriyalarida 4 soat davom etadi;
• nazariy tur yakunlariga ko‘ra eng yuqori natija ko‘rsatgan ishtirokchilarning 50 foizi amaliy turga o‘tadi;
• har bir tur 100 ballik tizimda baholanadi;
• yakuniy maksimal natija — 200 ball.

Topshiriqlar yo‘nalishlari

Olimpiada topshiriqlari ishtirokchilarning nazariy bilimlari, amaliy ko‘nikmalari va nostandart vaziyatlarda mustaqil qaror qabul qilish qobiliyatini baholashga qaratiladi.

G‘oliblarni taqdirlash va rag‘batlantirish

Olimpiada sovrindorlari oltin, kumush va bronza medallari hamda diplomlar bilan taqdirlanadi.

O‘zbekiston Respublikasi oliy ta’lim tashkilotlari talabalari orasidan sovrinli o‘rinlarni egallaganlar va ularni tayyorlagan ustozlar amaldagi tartibga muvofiq rag‘batlantiriladi.

Olimpiada g‘olibi bo‘lgan O‘zbekiston Respublikasi talabalarining magistraturaga davlat granti asosida imtihonsiz qabul qilinishi tegishli qonunchilikda belgilangan tartibda ta’minlanadi.

Batafsil ma’lumot uchun

Olimpiada, universitet ichki saralash bosqichi hamda ishtirok etish tartibi bo‘yicha batafsil ma’lumot olish uchun fakultetlarning o‘quv ishlari bo‘yicha dekan o‘rinbosarlariga murojaat qilishingiz mumkin.