Chirchiq davlat pedagogika universitetida “Ipoteka-bank o‘quv-amaliy laboratoriyasi” ochildi
Chirchiq davlat pedagogika universitetida “Ipoteka-bank” ATIB bilan hamkorlikda Iqtisodiyot va menejment kafedrasi huzurida “Ipoteka-bank o‘quv-amaliy laboratoriyasi”ning tantanali ochilish marosimi bo‘lib o‘tdi.
Mazkur laboratoriya Prezidentimiz tomonidan yoshlar siyosati sohasida ilgari surilayotgan tashabbuslar, xususan, yoshlarni zamonaviy kasblarga tayyorlash, ularning bandligini ta’minlash, tadbirkorlik va moliyaviy savodxonlik ko‘nikmalarini rivojlantirishga qaratilgan tizimli ishlarning amaliy ifodasi sifatida tashkil etildi.
Yangi o‘quv-amaliy laboratoriya talabalar uchun bank-moliya sohasi, menejment, mijozlar bilan ishlash, kreditlash, moliyaviy tahlil, raqamli bank xizmatlari va tadbirkorlik faoliyatiga oid amaliy bilimlarni egallash imkonini beradi. Bu yerda amaliy mashg‘ulotlar, seminarlar, mahorat darslari, moliyaviy savodxonlik treninglari, biznes loyiha taqdimotlari hamda bank mutaxassislari ishtirokidagi ochiq muloqotlar tashkil etiladi.
Laboratoriyaning ochilishi universitetda ta’lim, amaliyot va ish beruvchilar hamkorligini yanada mustahkamlash, talabalarning mehnat bozorida raqobatbardosh mutaxassis bo‘lib shakllanishi, yoshlarning tadbirkorlik tafakkuri va moliyaviy madaniyatini rivojlantirishga xizmat qiladi.
Shuningdek, Ipoteka bank va ChDPU o‘rtasida amaliy va akademik hamkorlik bo‘yicha Anglashuv memorandumi imzolandi. Mazkur hujjat tomonlar o‘rtasida talabalarning moliyaviy va tadbirkorlik savodxonligini rivojlantirish, ta’lim va amaliyot integratsiyasini kuchaytirish maqsadini ko‘zlaydi.
Tadbir davomida universitet rahbariyati, “Ipoteka-bank” vakillari, professor-o‘qituvchilar va talabalar ishtirok etib, mazkur hamkorlikning kelgusidagi istiqbollari haqida fikr almashdilar.
Universitet Axborot xizmati
Galereya
