“So‘z va vijdon uyg‘unligi” mavzusida o‘tkazilgan tadbir
HISOBOTI
Chirchiq davlat pedagogika universiteti Gumanitar fanlar fakulteti O‘zbek adabiyotshunosligi kafedrasi professor-o‘qituvchilari, shuningdek, O‘zbek tili va adabiyoti yo‘nalishi talabalari hamda magistrantlari ishtirokida 2026-yil 21-aprel kuni taniqli adib va publitsist, Xalqaro Cho‘lpon mukofoti sovrindori, “Xalq so‘zi” va “Народное слово” gazetalarining bosh muharriri O‘tkir Rahmat bilan “So‘z va vijdon uyg‘unligi” deb nomlangan adabiy-badiiy kecha bo‘lib o‘tdi.
Uchrashuvda adibning ijodiy va publitsistik faoliyati hamda milliy matbuot rivojiga qo‘shgan hissasi haqida so‘z yuritildi. Tadbir doirasida O‘tkir Rahmatga “Universitet faxriy professori” unvoni tantanali ravishda topshirildi. Ushbu adabiy-badiiy kechada talabalar o‘z chiqishlari bilan ishtirok etdilar. Jumaladan, she’r, qo‘shiq va sahna ko‘rinishlari namoyish etildi. Yoshlar adib bilan ochiq muloqot qilib, o‘zlarini qiziqtirgan savollarga javob oldilar. Tadbir samimiy va ma’naviy muhitda o‘tdi.

San'at va ilm chorrahasida: Tesha Mo‘minov ijodiga nazar

Chirchiq davlat pedagogika universitetida teatr san’atini targ‘ib etishga bag‘ishlangan «San'at va ilm chorrahasida» ijodiy kechasi bo'lib o'tdi. Kechada O‘zbek Milliy akademik drama teatri aktyori, O‘zbekiston Xalq artisti Tesha Mo‘minovning hayot yo‘li, yoshlik shijoati, ustozlar sabog‘i, sahnada rol ustida ishlashi jarayonlari haqida fikr yuritildi.

Kechada O‘zbekiston Xalq artistlari Muqaddas Holiqova va Gavhar Zokirova, O‘zbekistonda va Qoraqolpog‘istonda xizmat ko‘rsatgan artistlar Ra’no Yarasheva va Tolib Mo‘minov, teatr aktyorlari Davron Karimov va Sharofiddin Muzropov, “Guliston” va “Teatr” jurnallari Birlashgan tahririyati bosh muharriri Shahribonu Imomovaning ustoz-san’atkor Tesha Mo‘minov ijod yo‘liga e’tibor orqali o‘zbek teatr san’atini targ‘ib etishga bag‘ishlangan chiqishlari bilan yodda qoldi.

Ijodiy kecha davomida san’atkorlar dastlab talabalarga o‘zbek mumtoz teatr merosi — Milliy teatr spektakllarining nafis va murakkab namunalarini taqdim etishdi. Ushbu chiqishlar universitet jamoatchiligi, san’atshunos olimlar hamda talaba yoshlar tomonidan katta qiziqish bilan qarshi olindi. Talabalar ushbu jarayonda mashhur aktyorlarning jonli chiqishlarini ko‘rib, o‘zbek teatr san’atining nozik jihatlari bilan yaqindan tanishish imkoniga ega bo‘ldilar.

Ijodiy kechaning yana bir muhim qismi O‘zbekiston Xalq artisti, Davlat mukofoti sovrindori Tesha Husainovich Mo‘minov Chirchiq davlat pedagogika universiteti “Faxriy professori” unvoni bilan taqdirlanishi O‘zbek Milliy akademik drama teatri jamoatchiligi tomonidan katta qiziqish va olqishlar bilan kutib olindi.

Mazkur tadbir davomida ishtirokchilarga teatr san’atining tarixiy ildizlari, uning badiiy-estetik xususiyatlari, O‘zbek teatr san’atining buyuk darg‘alari haqida ham fikrlar aytildi.

Shuningdek, Gumanitar fanlar fakulteti magistrlari va "Mehr" talabalar teatri ijodkorlari tomonidan Tesha Mo‘minov yaratgan obrazlaridan namunalari namoyish etildi. Kecha davomida talabalar monologlar ijro etdilar.

Ushbu ijodiy kecha "Yoshlar kuni” doirasida tashkil etildi. Mazkur tadbir talabalarda o‘zbek teatr san’atiga bo‘lgan katta qiziqish uyg‘otib, teatr san’atining boy merosini universitet muhitda targ‘ib etishga muhim hissa qo‘shdi.