Eko-idrok va xalqaro e’tirof: CHDPU talabalarining intellekt samarasi

     Samarqandda Ekologiya va iqlim o’zgarishi milliy qo’mitasi, Oliy ta’lim, fan va innovatsiyalar vazirligi, Samarqand viloyati hokimligi va “Zakovat” intellektual klubi tomonidan “Eko-zakovat” xalqaro musobaqasi o’tkazildi.
     Musobaqada Markaziy Osiyo mamlakatlari, xususan, Qozog’iston, Qirg’iz Respublikasi, Tojikiston, Turkmaniston hamda Ozarbayjondan kelgan hamda respublikamizning barcha hududlaridan jamoalar ishtirok etdi.
     Musobaqa ikki bosqichda o’tkazildi. Dastlab mahalliy jamoalar atrof-muhitni muhofaza qilish borasidagi bilimlarini sinovdan o’tkazishdi. Ishtirokchilarga atmosfera havosini muhofaza qilish, tabiiy resurslardan oqilona foydalanish, chiqindilarni belgilanmagan joyga tashlamaslik va boshqa ekologik masalalarni qamrab olgan jami 24 ta savol yo’llandi. Yakunda Surxondaryo viloyati 1-o’rinni, Toshkent viloyatidan Chirchiq davlat pedagogika universiteti yoshlari 2-o’rinni,     Qoraqalpog’iston Respublikasi jamoasi 3-o’rinni egalladi. G’oliblar munosib taqdirlandi.
     Shuningdek, intellektual o’yin ishtirokchilari uchun tarixiy obidalarga sayohat tashkil etildi. Qolaversa, daraxt ekish aksiyasi ham bo’lib o’tdi.
     “Eko-zakovat” xalqaro musobaqasi yoshlarning ekologik bilimlarini yanada mustahkamlashga, mahalliy va xalqaro yoshlarni bir maqsad — tabiatni asrash yo’lida birlashtirishga va o’zaro tajriba almashishga xizmat qildi.

Universitet Axborot xizmati