2026-yil 4-may kuni Universitetning Aniq fanlar hamda Tabiiy fanlar fakultetlarida milliy reyting indikatorlariga bag‘ishlangan seminar tashkil etildi.
Seminar O‘zbekiston Respublikasi Prezidenti Administratsiyasi huzuridagi Ta’lim sifatini ta’minlash milliy agentligi tomonidan tasdiqlangan “Oliy taʼlim tashkilotlarining milliy reytingini yuritish toʻgʻrisidagi Nizom” talablari asosida professor-o‘qituvchilarning reyting indikatorlari bo‘yicha xabardorligini oshirish, mavjud holatni tahlil qilish va fakultetlar kesimida ustuvor vazifalarni belgilash maqsadida o‘tkazildi.
Tadbirda professor-o‘qituvchilarga akademik faoliyat, ilmiy faoliyat, xalqaro faoliyat, bitiruvchilar sifati va raqamlashtirishga oid mezonlar yuzasidan tushuntirishlar berildi.
Seminar yakunida ishtirokchilar tomonidan berilgan savollar muhokama qilindi. Xususan, professor-o‘qituvchilar akademik mobilligini rasmiylashtirish, minimal ko‘rsatkichlarga erishish, bitiruvchilar sifati hamda raqamlashtirish yo‘nalishidagi indikatorlarni amaliyotga joriy etish masalalariga alohida e’tibor qaratildi.
Shuningdek, Ta’lim sifatini ta’minlash bo‘limi tomonidan Scopusda indekslangan maqolalar va ularga iqtiboslik (h-index) bo‘yicha rag‘batlantirish tizimi yana bir bor eslatib o‘tildi. Universitetning maqsadli ko‘rsatkichlariga erishish bo‘yicha professor-o‘qituvchilarga qo‘shimcha tavsiyalar berildi.
O'ylaymizki, seminar milliy reyting indikatorlarini fakultetlar faoliyatiga tizimli integratsiya qilish, ilmiy natijadorlikni oshirish va universitetning strategik maqsadlariga erishishga xizmat qiladi.
