Chirchiq davlat pedagogika universitetida “Oliy taʼlim tashkilotlarining milliy reytingini yuritish toʻgʻrisidagi Nizom” mazmunini professor-o‘qituvchilarga yetkazish bo‘yicha tashkil etilgan seminarlar yakuniga yetdi.
Seminarlar turkumining so‘nggi uchrashuvi 8-may kuni Ta’lim sifatini ta’minlash bo‘limi tomonidan Jismoniy madaniyat hamda San’atshunoslik fakultetlarida o‘tkazildi. Muloqot davomida milliy reyting indikatorlarining fakultetlar faoliyatiga tatbiqi, mavjud strategik yondashuvlar va kelgusidagi ustuvor vazifalar muhokama qilindi.
Professor-o‘qituvchilar tomonidan ijodiy va amaliy yo‘nalishlarning o‘ziga xos xususiyatlari, reyting indikatorlarining SWOT tahlil, olingan tavsiyalarni takomillashtirish hamda natijadorlikni oshirish masalalari yuzasidan savollar berildi. Shuningdek, milliy reyting indikatorlarida bevosita ko‘rsatilmagan, biroq universitetning umumiy rivojlanish strategiyasi va maqsadli ko‘rsatkichlariga xizmat qiladigan yo‘nalishlar bo‘yicha ham qo‘shimcha tavsiyalar berildi.
Mazkur seminarlar professor-o‘qituvchilarning reyting mezonlari bo‘yicha xabardorligini oshirish, fakultetlar kesimida mavjud imkoniyatlarni aniqlash va universitetning istiqboldagi natijalarini yaxshilashga qaratilgan muhim amaliy qadam bo‘ldi.
