Universitetda ta’lim sifati bo‘yicha keng qamrovli so‘rovnomalar o‘tkazildi

Chirchiq davlat pedagogika universitetida ta’lim sifati, o‘quv jarayonining samaradorligi hamda manfaatdor tomonlarning fikr-mulohazalarini o‘rganish maqsadida talabalar, professor-o‘qituvchilar, bitiruvchilar va ish beruvchilar o‘rtasida keng qamrovli so‘rovnomalar o‘tkazildi.

So‘rovnomalarda jami minglab respondentlar ishtirok etib, ta’lim dasturlarining mazmuni, amaliy mashg‘ulotlar samaradorligi, raqamli ta’lim muhiti, baholash shaffofligi, ilmiy faoliyat, bandlik, amaliyot jarayonlari hamda bitiruvchilarning kasbiy tayyorgarligi bo‘yicha o‘z fikr va takliflarini bildirdi. Xususan, talabalar so‘rovnomasida 5064 nafar respondent qatnashdi.

Tahlil natijalariga ko‘ra, respondentlarning katta qismi universitetdagi ta’lim jarayoni, professor-o‘qituvchilar faoliyati, akademik halollik tizimi, kutubxona va elektron resurslardan foydalanish imkoniyatlarini ijobiy baholagan. Ayniqsa, pedagogik va ishlab chiqarish amaliyoti, zamonaviy pedagogik texnologiyalardan foydalanish hamda o‘quv dasturlarining mehnat bozori talablariga mosligi yuqori ko‘rsatkichlarni qayd etdi.

Shu bilan birga, so‘rovnoma natijalari asosida amaliy mashg‘ulotlarni yanada kuchaytirish, raqamli ta’lim muhiti va Wi-Fi infratuzilmasini takomillashtirish, psixologik va ijtimoiy qo‘llab-quvvatlash xizmatlari haqida xabardorlikni oshirish, inklyuziv ta’lim imkoniyatlarini kengaytirish hamda talabalar va ish beruvchilar bilan qayta aloqa tizimini rivojlantirish zarurligi belgilandi.

Mazkur tahliliy hisobotlar asosida universitet tomonidan kompleks chora-tadbirlar rejasi ishlab chiqildi. Rejada ta’lim dasturlarini takomillashtirish, amaliyot bazalarini kengaytirish, xalqaro hamkorlikni rivojlantirish, Scopus va Web of Science bazalaridagi ilmiy faoliyatni qo‘llab-quvvatlash, AKT va chet tili kompetensiyalarini kuchaytirish kabi ustuvor vazifalar belgilandi.

Universitetda o‘tkazilayotgan bunday muntazam so‘rovnomalar ichki sifatni ta’minlash tizimini rivojlantirish, ta’lim xizmatlari sifatini oshirish hamda talabalar va manfaatdor tomonlar ehtiyojlariga mos zamonaviy ta’lim muhitini yaratishga xizmat qilmoqda.