Xalq ustasi Alisher Nazirov bilan mahorat darsi: an’ana va zamonaviylik uyg‘unligi
Chirchiq davlat pedagogika universitetida O‘zbekiston xalq ustasi Alisher Nazirov ishtirokida mahorat darsi tashkil etildi. Milliy kulolchilik an’analarini yosh avlodga yetkazish, amaliy san’at sirlarini o‘rgatish va talabalarning ijodiy salohiyatini rivojlantirishga qaratilgan tadbir mazmunli muloqot va amaliy mashg‘ulotlarga boy bo‘ldi.
Dastlab talabalar kulolchilik san’atining o‘ziga xos jihatlari, uning nozik sir-sinoatlari va an’anaviy ish usullari bilan tanishtirildi. Xalq ustasi tomonidan tashkil etilgan amaliy mashg‘ulotlar davomida ishtirokchilar kulolchilik buyumlarini yaratish jarayonini bevosita kuzatish, milliy hunarmandchilikning o‘ziga xos xususiyatlari va mahorat talab etadigan jihatlari haqida amaliy bilimlarga ega bo‘lish imkoniyatiga ega bo‘ldilar.
Tadbir davomida tasviriy san’at ta’limida an’anaviy va zamonaviy yondashuvlar integratsiyasi, amaliy san’at va badiiy kulolchilikni o‘qitishning zamonaviy metodikalari, sohadagi mavjud muammolar hamda innovatsion yondashuvlar atroflicha muhokama qilindi.
Shuningdek, milliy xalq san’ati merosini asrab-avaylash va uni ta’lim jarayoniga keng tatbiq etish, o‘quv dasturlarini mazmunan boyitish hamda bo‘lajak mutaxassislarning amaliy ko‘nikmalarini rivojlantirishga qaratilgan takliflar ilgari surildi.
Mazkur mahorat darsi milliy hunarmandchilik an’analarini zamonaviy ta’lim bilan uyg‘unlashtirish, talabalarning badiiy tafakkuri va ijodiy salohiyatini yuksaltirish, shuningdek, san’at ta’limida amaliy tajribaning ahamiyatini oshirish yo‘lidagi muhim qadam bo‘ldi.
Universitet Axborot xizmati
Galereya
