Talabalar kuni — ijodkorlik va kommunikativ mahorat maydoni
Chirchiq davlat pedagogika universiteti Turizm fakultetida Xalqaro talabalar kuni munosabati bilan 2-bosqich talabalari o‘rtasida ingliz tilida rolli o‘yinlar (Role-play) asosidagi ijodiy sahna ko‘rinishlari tashkil etildi.
Mazkur tadbirda 25.2, 25.4 va 25.6-guruh talabalari faol ishtirok etib, o‘zlarining ingliz tilidagi nutqiy ko‘nikmalari, ijodiy yondashuvlari va sahna mahoratlarini namoyish etdilar.
Tadbirning asosiy maqsadi talabalarning ingliz tilida kommunikativ kompetensiyasini rivojlantirish, ularning ijodiy tafakkurini rag‘batlantirish, jamoaviy ishlash ko‘nikmalarini mustahkamlash hamda chet tilini o‘rganishga bo‘lgan qiziqishini oshirishdan iborat bo‘ldi.
Sahna ko‘rinishlari davomida talabalar turli obrazlarni gavdalantirib, ingliz tilida dialoglar olib bordilar va o‘z fikrlarini ijodiy shaklda ifodalash imkoniyatiga ega bo‘ldilar.
Rolli o‘yinlar orqali talabalarning quyidagi ko‘nikmalarini rivojlantirishga alohida e’tibor qaratildi:
- Ingliz tilida erkin va ravon muloqot qilish;
- Ijodiy va tanqidiy fikrlash;
- Jamoada hamkorlikda ishlash;
- O‘z fikrini ishonch bilan ifodalash;
- Turli kommunikativ vaziyatlarda til vositalaridan samarali foydalanish.
Ushbu tadbir ingliz tilini o‘qitishda interaktiv metodlar va lingvokreativ yondashuvlardan foydalanishning amaliy namunasi bo‘lib xizmat qildi.
Bunday ijodiy mashg‘ulotlar talabalarning nafaqat til ko‘nikmalarini, balki ularning shaxsiy faolligi, tashabbuskorligi va kommunikativ salohiyatini rivojlantirish uchun ham muhim pedagogik ahamiyatga ega.