05.02.2020
Bu haqda Prezidentning 2020 yil 30 yanvardagi qarorida qayd etilgan, qaror matni O‘zAda joylashtirilgan.
2018–2019 yillarda mazkur yo‘nalishga ekvivalenti 200,0 mln AQSh dollari miqdoridagi kreditlar jalb etishga erishildi. Ular hisobidan 140,1 ming o‘rinli nodavlat maktabgacha ta’lim tashkilotlarini tashkil etish uchun imzolangan 1 412 ta davlat-xususiy sheriklik to‘g‘risidagi bitimlardan 992 tasi bo‘yicha imtiyozli kreditlar berilgan. 420 ta bitimlarning 100 dan ortig‘i bo‘yicha xususiy sheriklar tomonidan ishlar hajmining to‘rtdan bir qismidan ko‘prog‘i bajarilgan.
Boshlangan ishlarni davom ettirish uchun banklarga tuzilgan shartnomalar bo‘yicha kreditlarni moliyalashtirish uchun qo‘shimcha mablag‘lar beriladi. Xususan, Moliya vazirligi tomonidan 1 martga qadar 182 mlrd so‘m mablag‘ ajratiladi, ular hisobidan 15 yil muddatga, shu jumladan 3 yillik imtiyozli davr bilan yillik 1%li stavka bo‘yicha kreditlar beriladi. Olingan foizlar to‘liqligicha bankda qoldiriladi. 1 dekabrga kelib ushbu mablag‘lar hisobidan kreditlar berilgan shartnomalar bo‘yicha ishlarning kamida 25%i bajarilishi lozim.
2018–2019 yillarda belgilangan tartibda tuzilgan 300 dan ortiq bitimlar bo‘yicha kreditlar 2020 yilda xalqaro moliya institutlaridan ushbu maqsadlar uchun jalb etiladigan imtiyozli kreditlar (qarzlar) hisobidan moliyalashtiriladi. Bunda kredit muddati bir xil: 15 yil muddatga, shu jumladan 3 yillik imtiyozli davr bilan, biroq foiz stavkasi turlicha bo‘ladi (to‘lanadigan foiz quyidagicha taqsimlanadi: 2%i bankda qoldiriladi, 98%i respublika budjetiga o‘tkaziladi):
Toshkent va Nukus shaharlari, viloyatlarning ma’muriy markazlari hamda viloyat bo‘ysunuvidagi shaharlarda - yillik 12%;
tumanlarning ma’muriy markazlarida - yillik 8%;
tumanlarning boshqa hududlarida - yillik 5% stavka bo‘yicha beriladi.
2021 yil va kelgusi yillarda tuziladigan bitimlar bo‘yicha kreditlar banklar tomonidan mustaqil belgilanadigan foiz stavkalarida beriladi hamda xalqaro moliya institutlaridan jalb etiladigan imtiyozli kreditlar (qarzlar) va avval ajratilgan kreditlar bo‘yicha xususiy sherik tomonidan qaytariladigan asosiy qarzlar hisobidan moliyalashtiriladi.
2018–2019 yillarda belgilangan tartibda imzolanib, moliyalashtirilmagan hamda kelgusi yillarda tuziladigan bitimlar bo‘yicha kreditlar ushbu bitimlarda nazarda tutilgan xususiy sherikning o‘z mablag‘lari hisobidan bajarilishi (sotib olinishi) lozim bo‘lgan ishlar (tovarlar) to‘liq amalga oshirilganidan so‘ng banklar tomonidan moliyalashtiriladi.
DXSh loyihalari ustuvor tartibda Toshkent va Nukus shaharlari, viloyat bo‘ysunuvidagi shaharlar, viloyat va tumanlarning ma’muriy markazlarida amalga oshiriladi. Buning uchun hududlarda mavjud maktabgacha ta’lim tashkilotlarining quvvati va qamrovi o‘rganib chiqiladi hamda unda yashayotgan aholi sonidan kelib chiqqan holda yangi va faoliyat yuritayotgan nodavlat maktabgacha ta’lim tashkilotlarning qo‘shimcha o‘rinlarga bo‘lgan ehtiyoji aniqlanadi.
2020 yil va kelgusi yillarda bitimlar faqatgina xalqaro moliya institutlaridan jalb qilingan kreditlar (qarzlar) hamda avval ajratilgan kreditlar bo‘yicha xususiy sherik tomonidan qaytariladigan asosiy qarzlar hisobidan maxsus ochilgan shaxsiy g‘azna hisobvarag‘ida jamlangan mablag‘lar doirasida tuziladi.
Moliya vazirligi tomonidan xususiy sheriklarga berilgan kreditlar hamda maktabgacha ta’lim tashkilotlariga ajratilgan budjet subsidiyalari maqsadli va samarali ishlatilishi bo‘yicha doimiy monitoring yo‘lga qo‘yiladi.
Podrobnee: https://www.norma.uz/uz/qonunchilikda_yangi/maktabgacha_talimda_dhsh_surati_oshiriladi