Chirchiq davlat pedagogika universiteti kengashi

O‘zbekiston Respublikasining “Ta’lim to‘g‘risida”gi qonuni, 2019-yil 17-iyundagi “2019-2023 yillarda Mirzo Ulugbek nomidagi O‘zbekiston Milliy universitetida talab yuqori bo‘lgan malakali kadrlar tayyorlash tizimini tubdan takomillashtirish va ilmiy salohiyatni rivojlantirish chora-tadbirlari to‘g‘risida”gi 4358-son, 2021-yil 24-dekabrdagi “Davlat oliy ta’lim muassasalarining akademik va tashkiliy-boshqaruv mustaqilligini ta’minlash bo‘yicha qo‘shimcha chora-tadbirlar to‘g‘risida”gi PQ-60-son qarorlari, 2019-yil 27-maydagi “O‘zbekiston Respublikasida korrupsiyaga qarshi kurashish tizimini yanada takomillashtirish chora-tadbarlari to‘g‘risida”gi PF-5729-son, 2019-yil 8-oktabrdagi “O‘zbekiston Respublikasi oliy ta’lim tizimini 2030-yilgacha rivojlantirish konsepsiyasini tasdiqlash to‘g‘risida”gi PF-5847-son farmonlari, hamda Vazirlar Mahkamasining 2006-yil 10-fevraldagi “Oliy ta’lim muassasalariga pedagog xodimlarni tanlov asosida ishga qabul qilish tartibi to‘g‘risidagi nizom”ni tasdiqlash haqidagi 20-son, 2017-yil 22-maydagi “Oliy o‘quv yurtidan keyingi ta’lim tizimini takomillashtirish chora-tadbirlari to‘g‘risida”gi 304-son, 2019-yil 19-iyuldagi “Oliy malakali ilmiy va ilmiy-pedagog kadrlarni maqsadli tayyorlash tizimini takomillashtirish to‘g‘risida”gi 606-son qarorlari hamda “Oliy ta’lim Kengashi to‘g‘risida Nizom”ga asosan Chirchiq davlat pedagogika universiteti Kengashi faoliyatini tashkil etish tartibini belgilaydi.

Universitet Kengashi (keyingi o‘rinlarda Kengash deb yuritiladi) faoliyatiga oid masalalarni ko‘rib chiqish uchun rektor raisligida tashkil etiladi.

Kengash tarkibi rektor, prorektorlar, fakultet dekanlari, tarkibidagi yuridik maqomga ega tashkilotlar rahbarlari, jamoat tashkilotlari rahbarlari, talabalar vakillaridan tashkil etiladi. Kengashning boshqa a’zolari, shu jumladan kafedra mudirlari fakultet umumiy majlisida yashirin ovoz berish yo‘li bilan saylanadi, professor-o‘qituvchilar tarkibidan Kengashga saylanuvchi a’zolar soni buyruq bilan belgilanadi.

Kengash tarkibiga ilmiy maktab rahbarlari, sohaning nufuzli olim-akademiklari, sohaning ilg‘or mutaxassislari, boshqa oliy ta’lim tashkilotlari va ilmiy-tadqiqot institutlari vakillari tarkibidan kiritilishi mumkin.

Kengash a’zolarining vakolat muddati 5 yilni tashkil etadi.

Kengash a’zolari tarkibini 5 yil muddatdan keyin qayta shakllantirish haqidagi taklif rektor tomonidan Kengash majlisi kun tartibiga kiritiladi.

Kengash tarkibi rektor buyrug‘i bilan tasdiqlanadi. Doimiy ravishda har o‘quv yili boshida, yoki sabablarga ko‘ra Kengash tarkibidan chiqqan a’zolar o‘rniga, yangi a’zolar saylanadi, yoki mazkur Nizomda belgilangan tartibda kiritiladi.

Kengashning maqsad va vazifalari

Kengashning maqsadi intellektual salohiyat va boshqa barcha imkoniyatlarni oliy ta’lim mazmunini sifat jihatdan yangi bosqichga ko‘tarish, mehnat bozorida o‘z o‘rnini topa oladigan malakali kadrlar tayyorlash, oliy ta’limning investitsiyaviy jozibadorligini oshirish, xalqaro tajribalar asosida o‘qitishning kredit-modul tizimini joriy etish, davlat ta’lim standarti talablari darajasida mukammal bilim, ijodiy ko‘nikma va amaliy malakalarga ega professional kadrlar tayyorlashga, xususan, Universitetni mamlakat oliy ta’lim muassasalari flagmaniga aylantirish, xalqaro e’tirof etilgan tashkilotlar (Quacquarelli Symonds World University Rankings, Times Higher Education yoki Academic Ranking of World Universities) reytingining birinchi 500 ta o‘rindagi oliy ta’lim tashkilotlari ro‘yxatiga kiritishni ta’minlashga yo‘naltirishdan iborat.

Kengash vazifalari:

davlat ta’lim standartlari, o‘quv rejalari va dasturlari ijrosini o‘rganib chiqadi hamda ularning ustuvor masalalariga oid ko‘rsatmalar belgilaydi;

korrupsiyaga qarshi kurashish choralarini ishlab chiqadi, ularni amalga oshirilishini nazorat qiladi, zarur hollarda korrupsiyaga qarshi kurashish bo‘yicha maxsus komissiyalar tuzadi, ular ish faoliyatini muvofiqlashtiradi, natijalarini tahlil qiladi va qarorlar qabul qiladi;

malakali kadrlar tayyorlash tizimini tubdan takomillashtirish va ilmiy salohiyatni rivojlantirish dasturlari bajarilishini muhokama etib boradi;

akademik litsey, qabul komissiyasi qabuli natijalarini eshitadi va qarorlar qabul qiladi;

o‘quv, ma’naviy-ma’rifiy, ilmiy-tadqiqot, xalqaro aloqalar ishlari ijrosi, professor-o‘qituvchilarning malaka oshirish va qayta tayyorlash masalalarini muhokama qiladi hamda qarorlar qabul qiladi;

professor-o‘qituvchilar tarkibining lavozimlarni egallashi, professor yoki dotsent ilmiy unvonlariga tavsiya etish bo‘yicha o‘tkaziladigan taqdimnomalarni muhokama qiladi, kafedra mudiri, professor-o‘qituvchilar tanlovlarini o‘tkazadi va ular yuzasidan qarorlar qabul qiladi;

professor-o‘qituvchilar tayyorlagan darslik, o‘quv qo‘llanmalarni belgilangan tartibda nashr etishga tavsiya etishni muhokama qiladi va qarorlar qabul qiladi;

professor-o‘qituvchilarning ilm-fan, adabiyot va san’at sohasidagi ilmiy ishlarini Davlat mukofotlari tanlovlariga ishtirok etishi, O‘zbekiston Fanlar akademiyasi akademikligiga nomzodlar ko‘rsatish masalalarini muhokama etadi va qarorlar qabul qiladi;

ilmiy-texnik salohiyat, moddiy-texnik bazasini rivojlantirishga katta hissa qo‘shgan xorijiy yetuk olimlar, soha kadrlari, adabiyot va san’at sohasi vakillarini “Faxriy professor” unvoniga tavsiya qilishni muhokama etadi va qarorlar qabul qiladi;

yosh olimlar va professor-o‘qituvchilar tarkibidan xorijiy mamlakatlarda malaka oshirish, stajirovka o‘tash, magistratura, doktoranturada o‘qishga yuborishga tavsiya etadi;

doktorant va mustaqil izlanuvchilar doktorlik dissertatsiyalari mavzularini muhokama qiladi va qarorlar qabul qiladi;

iqtidorli talabalar va doktorantlar, mustaqil tadqiqotchi-izlanuvchilar safidan Respublika Prezidenti Davlat stipendiyasi va nomli davlat stipendiyalar tanlovida ishtirok etadigan nomzodlarni tavsiya etadi;

talabalar ilmiy-ijodiy tashabbusini qo‘llab-quvvatlash va rag‘batlantirish, yangi ish o‘rinlarini yaratish, ishga joylashtirish, bo‘sh vaqtlarini mazmunli o‘tkazish choralarini ko‘rish, sport sog‘lomlashtirish bazalar qurish masalalarini o‘rganadi va qarorlar qabul qiladi;

asosiy buyurtmachi tashkilot, korxona va muassasalar bilan korporativ hamkorlikni rivojlantirish, moddiy-texnik bazani mustahkamlash hamda talabalar malakaviy amaliyoti samaradorligini oshirish masalalarini muhokama qiladi va ularni yaxshilash bo‘yicha qarorlar qabul qiladi;

xorijiy mamlakatlar oliy ta’lim tashkilotlari bilan hamkorlik aloqalarini o‘rnatish, talabalar va professor-o‘qituvchilar akademik mobilligi, xorijiy olimlar va soha mutaxassislari, shu jumladan, xorijda ishlayotgan vatandoshlarni qisqa va uzoq muddatli ma’ruza va amaliyot o‘tishga chaqirishga oid qarorlar qabul qiladi;

tashkiliy tuzilmaga o‘zgartirish kiritish, fakultet, kafedra, ilmiy markazlar va ilmiy laboratoriyalar tashkil qilish, xorijiy oliy ta’lim va ilmiy muassasalari bilan qo‘shma fakultet va dasturlar tashkil qilish bo‘yicha qarorlar qabul qiladi;

ta’lim xizmatlari bilan shug‘ullanuvchi korxona, firma va kurslar faoliyati davrida rahbarlari takliflarini eshitadi va qaror qabul qiladi;

jamoat tashkilotlari faoliyatini muvofiqlashtiradi va ular faoliyatiga oid qarorlar qabul kiladi;

talabalar va xodimlar texnika xavfsizligi, mehnat muhofazasini yaxshilashga oid tadbirlarni belgilaydi va qarorlar qabul qiladi.

Chirchiq davlat pedagogika universiteti

Kengashi a’zolari

RO‘YXATI

Kengash rejasi universitet prorektorlari, bo‘lim boshliqlari, fakultet dekanlari, kafedra mudirlari va jamoat tashkilotlarining taklif-tavsiyalari asosida ishlab chiqilgan.

Kengash rejasiga universtitetning ish faoliyatidan kelib chiqqan holda tegishli o‘zgartirish va qo‘shimchalar kiritilishi mumkin. Kengash faoliyati davrida ta’lim-tarbiya va ilm-fanga oid qabul qilingan O‘zbekiston Respublikasi Prezidentining Farmon va Qarorlari, Vazirlar Mahkamasining Qarorlari, Oliy va o‘rta maxsus ta’lim vazirligining Hay’at Qarorlari va buyruqlari asosiy masala sifatida kiritiladi.

Turli masalalarga o‘quv, ilmiy, ma’naviy-ma’rifiy sohalarga oid hujjatlar, ma’lumotlarni tasdiqlash, o‘quv-ilmiy nashrlarni chop etish, dotsentlik, professorlik unvonlariga tavsiya etish, dissertatsiya mavzulari va ilmiy rahbarlarni tasdiqlash, olimlarning ishlarini davlat mukofotlariga tavsiya etish, xorijda malaka oshirgan va ilmiy tadqiqot ishlarini bajargan xodimlarning hisobotlarini muhokama etish, universitetning tuzilmalaridagi o‘zgarishlarga oid masalalar kiritilishi mumkin.

Kengash kun tartibiga kiritilgan masalalar bo‘yicha ma’ruza matni va qaror loyihasi, taqdimot materiallari Kengash yig‘ilishi o‘tkazilishidan 3 kun oldin Kengash kotibiga Kengash raisi tanishishi uchun topshirilishi kerak.

Turli masalalar bo‘yicha kun tartibiga kiritiladigan qisqa masala yoki hujjatlarni tasdiqlash bo‘yicha masalalar va ularning materiallari Kengash yig‘ilishi kunidan kamida 2 kun oldin Kengash kotibiga taqdim etiladi.

Kengash kun tartibiga kiritilishi lozim masalalar Kengash raisining roziligi bilan amalga oshiriladi.

Reglament: Asosiy masalalar bo‘yicha ma’ruzalarga – 15 daqiqagacha, muhokama va takliflar uchun – 5 daqiqagacha, turli masalalar bo‘yicha – 5 daqiqagacha vaqt ajratiladi.