Tashkil etilgan yili: 2018

Manzil: Toshkent viloyati, Chirchiq davlat pedagogika universiteti, 1-bino, 401-xona.

Fizika kafedrasi 2018-yil 29-avgustda Toshkent viloyati Chirchiq davlat pedagogika instituti Kengashining 1-sonli qarori bilan tashkil etilgan. Ilgari “Aniq fanlar” kafedrasi tarkibida faoliyat olib borgan bo‘lsa, keyinchalik mustaqil kafedra sifatida ajralib chiqdi. Bugungi kunda kafedra 60110700 - Fizika va astronomiya, 60530500-Fizika, 60530700 - Astronomiya ta’lim yo‘nalishlari uchun “Umumiy fizika (Mexanika)”, “Umumiy fizika (Molekulyar fizika)”, “Umumiy fizika (Elektr va magnetizm)”, “Umumiy fizika (Optika)”, “Umumiy fizika (Atom yadrosi va elementar zarralar fizikasi)”, “Umumiy astronomiya”, “Astrofizika”, “Nazariy fizika 1”, “Nazariy fizika 2”, “Mexanika”, “Molekulyar fizika”, “Elektr va magnetizm”, “Optika”, “Atom fizikasi”, “Atom yadrosi va elementar zarralar fizikasi”, “Elektronika va signallarni qayta ishlash”, “Astronomiya va astrofizika”, “Nazariy mexanika”, “Elektrodinamika”, “Mexanika va molekulyar fizika”, “Amaliy va umumiy astrofizika”, “Astrofizikaning matematik usullari”, “Galaktik astronomiya”, “Kosmogoniya asoslari”, “Nazariy fizika asoslari”, “Osmon mexanikasi”, “Quyosh fizikasi”, “Yulduzlar fizikasi” fanlarni, 70530510-Aniq va tabiiy fanlarni o‘qitish metodikasi (fizika va astronomiya) muraxassisligi uchun “Zamonaviy fizika va astronomiyaning fundamental asoslari, klassik va kvantoviy aspektlari”, “Eksperimental fizika metodlari”, “Nanotexnologiyalar va nanofizika”, “Astrofizika va yulduzlar astronomiyasi”, “Klassik va kvant fizikaning qo‘shimcha boblari”, “Ouyosh fizikasi va Quyoshning Yerga ta’siri” fanlarini o‘qitish bilan shug‘ullanadi.

Kafedraning maqsadi va vazifalari

Kafedraning missiyasi: Fizika va astronomiya ta’lim yo‘nalishi mazmunini xalqaro talablar darajasiga olib chiqish.

Maqsadlarimiz:

✔ Kasbiy sohalarga yo‘naltirilgan dasturlar va ilg‘or pedagogik usullar orqali fizika ta’limi sifatini oshirish.

✔ Xalqaro hamkorlikni kengaytirish – universitetlar, ilmiy jamoatchilik va ta’lim loyihalari bilan hamkorlikni yo‘lga qo‘yish.

✔ Ilmiy-tadqiqot muhitini rivojlantirish – fizika va muhandislik fanlari bo‘yicha ilg‘or ilmiy markazga aylanish.

O‘quv yo‘nalishlari va ta’lim dasturlari

Ilmiy-tadqiqot yo‘nalishlari va loyihalar

Fizika kafedrasi ilmiy-tadqiqot faoliyatida zamonaviy ilm-fan yutuqlariga tayangan holda bir qator strategik yo‘nalishlarda ish olib bormoqda. Tadqiqotlarning asosiy maqsadi zamonaviy fizika va astronomiya ta’lim metodlarini rivojlantirish, xalqaro ilmiy hamjamiyat bilan hamkorlikni kengaytirish hamda amaliy natijalarga erishishdan iborat. Kafedrada quyidagi asosiy ilmiy yo‘nalishlar bo‘yicha tadqiqotlar olib borilmoqda:

— Nazariy va amaliy fizika tadqiqotlari: Mazkur yo‘nalishda kvant mexanikasi, nazariy fizika va moddiy muhitlarning fizik xossalarini o‘rganishga qaratilgan tadqiqotlar olib borilmoqda. Jumladan, yarim o‘tkazgich materiallarning optik va elektr xususiyatlarini tadqiq qilish (I.G.Tursunov), turli muhitlarda elektromagnit to‘lqinlarning tarqalish xususiyatlarini o‘rganish (S.Z.Raxmanov) hamda noan’anaviy fizik modellar asosida fizikaviy jarayonlarni modellashtirish (K.R.Nasriddinov) bo‘yicha ilmiy izlanishlar olib borilmoqda.

— Nano va materialshunoslik yo‘nalishidagi tadqiqotlar: Zamonaviy nanotexnologiyalar, yangi materiallar va ularning fizik xossalarini o‘rganish bo‘yicha ilmiy ishlar amalga oshirilmoqda. Xususan, nanozarrachalarning optik va elektr xususiyatlari, ularning harorat va bosim ta’sirida o‘zgarishi kabi masalalar chuqur tadqiq etilmoqda (K.R.Nasriddinov, S.Z.Raxmanov).

— Astrofizik tadqiqotlar: Yulduzlar va galaktikalarning fizik tadqiqotlari kafedraning muhim ilmiy yo‘nalishlaridan biri hisoblanadi. Xususan, qo‘shaloq yulduzlarning optik teleskoplarda olingan kuzatuvlar tahlili (Sh.E.Nurmamatov) hamda Galaktika boy to‘dalarining sirt zichligi (S.Sh.Kutlimuratov) bo‘yicha tadqiqotlar olib borilmoqda.

— Fizika va astronomiya ta’limi metodikasi: Fizika va astronomiya fanini o‘qitish metodikasini rivojlantirish va ta’lim jarayoniga innovatsion yondashuvlarni tatbiq etish bo‘yicha izlanishlar olib borilmoqda. Jumladan, eksperimental fizika mashg’ulotlarini interfaol usullar orqali samarali tashkil etish (A.N.Ernazarov), ilmiy-tadqiqot yutuqlari asosida astronomiya ta’limini rivojlantirish (A.M.Tillaboyev), talabalarning umumiy astronomiya fanidan mustaqil ta’limini tashkil etishda raqamli texnologiyalardan foydalanish metodikasi (Sh.P.Begzatova), ta’lim klasteri sharoitida bo‘lajak fizika o‘qituvchilarining kasbiy kompetensiyasini rivojlantirish metodikasi (Y.X.Xudoyberdiyeva) hamda individual ta’lim asosida o‘quvchilarda fizik tafakkurni shakllantirishga qaratilgan metodik tadqiqotlar (A.O‘.Umbarov) amalga oshirilmoqda.

— Energetika va ekologik fizik tadqiqotlar: Muqobil energiya manbalaridan foydalanish, ekologik xavfsizlik va yashil texnologiyalarni rivojlantirish bo‘yicha tadqiqotlar olib borilmoqda. Shamol va quyosh energiyasidan foydalanish texnologiyalarining samaradorligini oshirish (U.A.Eshniyozov), energiyani tejovchi innovatsion tizimlarni yaratish (B.X.Eshchanov) bo‘yicha ilmiy ishlar olib borilmoqda.

Mazkur ilmiy yo‘nalishlar fizika kafedrasining ilmiy-tadqiqot salohiyatini yuksaltirishga, zamonaviy fizikaviy muammolarni hal qilishga va ta’lim sifatini oshirishga xizmat qilmoqda. 

Fizika kafedrasi tarkibi

Ilmiy tadqiqotlar va innovatsion loyihalar

Kafedra qoshida “Physics and Astronomy Research Hub” nomli ilmiy-metodik markazi faoliyati yo‘lga qo‘yilgan bo‘lib, ushbu markaz fizika va astronomiya sohasida innovatsion tadqiqotlar olib borishga, ilg‘or pedagogik texnologiyalarni amaliyotga tatbiq etishga hamda talabalarning ilmiy kompetensiyasini oshirishga qaratilgan. Markaz doirasida ilmiy seminarlar, tajriba almashish dasturlari va zamonaviy fizikaviy-astronomik tadqiqotlarga oid innovatsion loyihalar amalga oshirilmoqda. Shuningdek, o‘qituvchilar va tadqiqotchilar uchun ilmiy-metodik qo‘llanmalar ishlab chiqish, xalqaro grant loyihalarida ishtirok etish ham markazning asosiy faoliyat yo‘nalishlaridan biri hisoblanadi. Markazning asosiy maqsadi zamonaviy fizik va astronomik bilimlarni targ‘ib qilish, talabalar va yosh olimlarning tadqiqot faoliyatini qo‘llab-quvvatlash hamda ilmiy innovatsiyalarni amaliyotga joriy etishdan iborat.

KAFEDRANING TA’LIM SIFATI VA BAHOLASH TIZIMI

Ta‘lim sifati nazorati

Fizika kafedrasi ta‘lim sifati nazoratini oshirish bo‘yicha ichki va tashqi monitoring tizimlariga tayanadi:

Tashqi monitoring 

Universitetning Ta‘lim sifatini nazorat qilish bo‘yicha ishchi guruhi platformasi orqali ta’lim sifati muntazam tahlil qilinadi.

Fizika va kimyo fakulteti tarkibidagi Ta‘lim sifatini nazorat qilish komissiyasi doimiy ravishda baholash tizimi va ta’lim jarayonini kuzatib boradi.

Ichki monitoring 

Kafedraning ichki nazorati v.b. dotsent S.Sh.Kutlimuratov tomonidan olib boriladi. Kafedra yig‘ilishlarida doimiy hisobotlar taqdim etilib, ta’lim jarayonidagi kamchiliklar va takomillashtirish choralari muhokama qilinadi.

Baholash tizimi

Talabalarni baholash tizimi kafedraning o‘quv dasturlarida batafsil yoritilgan bo‘lib, baholash jarayoni kredit-modul tizimi asosida amalga oshiriladi.

Xalqaro ta‘lim sifati standartlariga mosligi 

• Talabalarning bilimlarini baholash me’zonlari “Fizika va astronomiya” fanlaridan GRE (Graduate Record Examinations) hamda Cambridge (Certificate of completion IGCSE Physics) talablari asosida tuzilgan.
• Bu tizim orqali talabalar xalqaro tan olingan GRE va IGCSE Physics sertifikatlariga ega bo‘ladi hamda xalqaro o‘qituvchi sifatida faoliyat yurita oladi.

Talabalar fikr-mulohazalari va qayta aloqa tizimi 

Kafedrada talabalar fikrini tinglash va baholash jarayonining shaffofligini ta’minlash maqsadida qayta aloqa mexanizmi yo‘lga qo‘yilgan.

Apellyatsiya jarayoni: yakuniy nazorat natijalari e’lon qilingandan so‘ng 24 soat ichida, talabalar kafedraning apellyatsiya komissiyasiga murojaat qilish imkoniyatiga ega. Bu jarayon baholash jarayonida yuzaga kelishi mumkin bo‘lgan noaniqliklarni bartaraf etish va talabalar fikrini inobatga olishga xizmat qiladi.

Doimiy fikr-mulohazalar: talabalarning ta’lim sifati bo‘yicha fikrlarini to‘plash uchun so‘rovnomalar va tahliliy hisobotlar muntazam o‘tkaziladi hamda murojaatlar o‘rganiladi. Bunday natijalar asosida o‘quv jarayonini yanada takomillashtirishga qaratilgan chora-tadbirlar ishlab chiqiladi.

TALABALAR HAYOTI

Kafedra qoshida talabalarning mutaxasislik fanlarini chuqurroq o‘rganishiga yo‘naltirilgan to‘garaklar tashkil etilgan.

Nazariy bilimlarni mustahkamlash – mashg‘ulotlarda o‘tilgan mavzular chuqurroq o‘rganiladi, amaliy misollar bilan tushuntiriladi.

Amaliy ko‘nikmalar shakllanishi – laboratoriya ishlarini bajarish, tajribalar o‘tkazish va ilmiy tadqiqotlar olib borish imkoniyati yaratiladi.

Innovatsion texnologiyalar bilan ishlash – optika, kvant mexanikasi, astronomik kuzatuv usullari va zamonaviy fizik asboblar bilan tanishish imkoniyati bo‘ladi.

Loyihalarda ishtirok etish – ilmiy-tadqiqot loyihalari, ilmiy maqolalar yozish, konferensiyalarda qatnashish imkoniyati.

Jamoaviy ishlash va fikrlash qobiliyatini rivojlantirish – guruhda ishlash, tajriba almashish va muammolarni hal qilish ko‘nikmalari shakllanadi.

Kelajak uchun tayyorgarlik – talabalar olgan tajriba ularga ilmiy ishlar, grantlar va magistratura dasturlariga tayyorlanishda yordam beradi.

Fizika va astronomiya to‘garaklari nafaqat nazariy bilimlarni oshiradi, balki amaliy ko‘nikmalarni ham shakllantirib, talabalarni kelajakdagi ilmiy yoki texnik sohadagi faoliyatiga tayyorlaydi.

Ilmiy faoliyatga yo‘naltirish

Kafedra professor-o‘qituvchilari talabalar va tadqiqotchilarni ilmiy faoliyatga yo‘naltirish bo‘yicha individual ta’lim muhitida ishlash uchun maxsus ilmiy planshetlar ishlab chiqqan.

Talabalar o‘z ilmiy maqolalari, tadqiqot ishlari va innovatsion g‘oyalari bilan ilmiy konferensiyalar va loyihalarda ishtirok etishlari mumkin.

Xalqaro o‘qituvchi tayyorlash va kasbiy rivojlanish

“Fizika va astronomiya” fanlaridan yaxshi o‘zlashtirgan talabalar Cambridge (Certificate of completion IGCSE Physics) kasbiy rivojlanish dasturlariga yo‘naltiriladi.

Kafedraning xalqaro reytinglardagi o‘rni.

Biz bilan bog‘laning

• Kafedra manzili: Toshkent viloyati, Chirchiq shahar A.Temur ko‘chasi 107-uy, 1-bino, 4-qavat, 401-xona.
• Elektron pochta: fizikakafedrasi@cspu.uz
• Kafedra kotibiyati: Sh.P.Begzatova (+998977027854)