O‘zbekiston Respublikasi Prezidentining 2025-yil 18-iyuldagi F–43-son farmoyishiga muvofiq, xorijda doimiy istiqomat qilayotgan vatandoshlar uchun bakalavriat ta’lim yo‘nalishlariga 30 ta davlat granti ajratilgan bo‘lib, mazkur grantlar o‘zbek tili, adabiyoti, tarix, madaniyat, san’at va hunarmandchilik yo‘nalishlarida tahsil olishni istagan xorijdagi vatandoshlar uchun mo‘ljallangan.

Tanlovda ishtirok etish talablari:

• Nomzod yoki uning ota-onasi (yaqin qarindoshi) etnik, til yoki madaniy-tarixiy nuqtayi nazardan o‘zini o‘zbek yoki qoraqalpoq sifatida identifikatsiya qilgan xorijiy fuqaro yoki fuqaroligi bo‘lmagan shaxs bo‘lishi;
• O‘zbekiston hududida tug‘ilib, hozirda xorijda doimiy yashayotgan bo‘lishi;
• O‘zbekiston ta’lim tashkilotlari tomonidan tasdiqlangan bakalavriat yo‘nalishlaridan biriga abituriyent sifatida ro‘yxatdan o‘tib, suhbat natijasida talabalikka tavsiya etilgan bo‘lishi;
• 30 yoshdan kichik bo‘lishi;
• O‘zbek tilini bilishi lozim.

Muddat:

• Arizalar qabul qilish muddati: 2025-yil 10-oktabrgacha.
• Arizalar https://qabul.cspu.uz/ havolasi orqali yoki intercoop@cspu.uz elektron manzili orqali qabul qilinadi.

Tanlovlar nomzod tanlagan bakalavriat yo‘nalishining kirish fanlari asosida o‘tkaziladi. Kasbiy (ijodiy) imtihon mavjud yo‘nalishlar bo‘yicha — tegishli oliy ta’lim muassasasi, test sinovlari bo‘yicha esa — Bilim va malakalarni baholash agentligi imtihonlar o‘tkazadi.

Natijalar bo‘yicha eng yuqori ball to‘plagan talabgorlar davlat granti sovrindori etib e’tirof etiladi.