Chirchiq davlat pedagogika universitetidagi fanlararo, ta’lim turlariaro, ta’lim sub’ektlariaro integratsiya faoliyati universitet rektori kimyo fanlari doktori, professor, O‘zbekiston fan arbobi Muxamedov G‘ofurjon Isroilovich g‘oyasi asosida tatbiq etilgan PTIK doirasida yanada rivojlanib bormoqda.
2023-2024 o‘quv yili davomida Universitetda ta’lim sifatini oshirish jarayoniga innovatsion texnologiya va yondashuvlarni tatbiq etish, kafedralararo ilmiy-amaliy tadqiqotlarni individual va integratsion texnologiyalar asosida amalga oshirish, fanlararo integratsiya asosidagi faoliyat natijalarini Tarix, Tasviriy san’at va muhandislik grafikasi ta’lim yo‘nalishi talabalarining iqtidor va qiziqishlariga ko‘ra Bitiruv malakaviy ishlarida namoyon qilish bo‘yicha tizimli ishlar amalga oshirildi. Integratsion bitiruv malakaviy ishlari Chirchiq davlat pedagogika universitetining asosiy strategik tadqiqot yo‘nalishi bo‘lgan Pedagogik ta’lim innovatsion klasteri maqsadlariga to‘liq javob beradi.
Universitet strukturasidagi tizimli integratsion faoliyatni muvofiqlashtirish maqsadida talabalar hamkorligida “Tarix – San’at – Madaniyat – Grafika” birligi asosidagi faoliyatni yanada rivojlantirish bo‘yicha loyihalar ishlab chiqilgan. 2024-yilning 11-iyun kuni shu loyihalar asosida turli yo‘nalish bitiruvchilari hamkorligida tayyorlangan bitiruv malakaviy ishlari himoyasi bo‘lib o‘tdi. Unda klaster yondashuvi doirasida fanlararo integratsion hamkorlikni yaratishga qaratilgan tasviriy san’at-tarix-muhandislik grafikasi, tasviriy san’at-dizayn-geografiya, tasviriy san’at-dizayn-kimyo, tasviriy san’at-musiqa-kompyuter grafikasi kabi yo‘nalish talabalarining birgalikdagi ilmiy-ijodiy-tadqiqot ishlari natijalari namoyish etildi. Unda ilmiy-ijodiy-tadqiqot mahsuli sifatida nazariy tadqiqotlar bilan birga amaliy ishlar sifatida haykallar, mahobatli va dastgohli rangtasvir asarlari, tariximizga oid 3D modellar loyihalari, libos dizayni, musiqiy kompozitsiyalarni kuzatish mumkin. San’atshunoslik fakulteti tashabbusi bilan amaliyotga tatbiq etilgan ushbu integratsion faoliyat boshqa yo‘nalish talabalarini umumiy maqsadga biriktirib, jamoa bo‘lib ilmiy-ijodiy tadqiqotlar olib borishlari uchun katta imkoniyatlar yaratib berdi desak bo‘ladi.
Masalan: “Buyuk ipak yo‘li: Sivilizatsiyalar to‘qnashuvi” nomli umumiy mavzuda bajarilgan tadqiqotlar natijasida ham ajoyib ilmiy materiallar to‘plandi, ham ijodiy asarlar paydo bo‘ldi. Tarix yo‘nalishi talabalarining o‘z fanlari bo‘yicha olgan bilimlari tasviriy san’at yo‘nalishi talabalarining tariximiz haqidagi nazariy biimlarini yanada chuqurlashtirishga xizmat qilgan bo‘lsa, ijodkor rassomlarning mahorati va rangtasvir asari tarix yo‘nalishi talabalarining tariximiz haqidagi tasavvurlarini yanada boyitdi. Bu asarda tasvirlangan har bir element, har bir holat, tarixiy shaxslar, ularning liboslari, shakl, rang va qahramonlarning yuz ifodasi, harakat, boshqa unsurlardagi ramziy belgilar haqidagi ma’lumotlar ikki mutaxassislik vakillari tomonidan sinchiklab o‘rganildi, tahlil qilindi. Har bir yo‘nalish uchun notanish ma’lumotlar ikki yo‘nalish talabalari va ularning rahbarlari o‘rtasidagi qizg‘in munozaralar orqali aniqlandi. Natijada tomashabin qabul qiladigan mukammal rangtasvir asari hamda ilmiy tadqiqotchilar uchun ajoyib ilmiy manbaa hosil bo‘ldi. Hamkorlikdagi integratsion BMI ushbu mavzuda hali hamkorlikda bajariladigan ishlar, uning o‘rganilmagan qirralari ko‘pligini ochib berdi.
Xulosa o‘rnida aytish mumkinki, bu kabi fanlararo integratsiya asosidagi Bitiriuv malakaviy ishlarini tayyorlash birinchi navbatda turli ta’lim yo‘nalishi talabalari o‘rtasidagi o‘zaro ilmiy tadqiqotchilik faoliyatini yanada rivojlantiradi.
