Oliy Majlis Senatining yoshlar, xotin-qizlar, madaniyat va sport masalalari qo‘mitasi senatori, ishchi guruh rahbari Malika Qodirxonova, universitet rektori G‘ofurjon Muhammedov boshchiligida Chirchiq davlat pedagogika universitetida Toshkent viloyatida yoshlar, xususan, oliy ta’lim muassasalari bitiruvchilari bandligini ta’minlash bo‘yicha ishchi guruh yig‘ilishi bo‘lib o‘tdi.
Yig‘ilishda yoshlar bandligini oshirish, zamonaviy mehnat bozori talablariga mos kadrlar tayyorlash, yangi ish o‘rinlari yaratish, shuningdek, oliy o‘quv yurtlari va ish beruvchilar o‘rtasida samarali hamkorlikni yo‘lga qo‘yishga oid muhim masalalar muhokama qilindi.
Ta’kidlanganidek, hozirgi kunda mehnat bozorida raqobatbardosh, ixtisoslashgan mutaxassislarga ehtiyoj oshib bormoqda. Shu munosabat bilan, bitiruvchilarni amaliy kasbiy faoliyatga tayyorlash, ularning real sektorda ishga joylashishiga ko‘maklashish dolzarb ahamiyat kasb etmoqda.
Mazkur yo‘nalishda olib borilayotgan ishlar samaradorligini oshirish maqsadida tegishli boshqarma va tashkilotlar rahbarlaridan iborat Bitiruvchilar bandligini ta’minlash bo‘yicha maxsus viloyat shtabi tashkil etildi. Ushbu shtab faoliyati doirasida bitiruvchilar bilan ishlashning aniq mexanizmlari ishlab chiqilib, har bir mutasaddi tashkilot oldiga vazifalar belgilab berildi.
