“Har bir oiladagi qizlar bog‘cha, maktab bilan to‘liq qamrab olinishi, zamonaviy kasb-hunar va chet tillarini egallashi, oliy ma’lumotga ega bo‘lishi uchun bundan buyon ham barcha sharoitlar yaratiladi. Xususan, bu yil 250 ming nafar qiz oliy ta’limga qamrab olinadi. Bu 2017 yilga nisbatan 3,5 karra ko‘p. Yana 250 ming nafar ayol kasb-hunar va tadbirkorlikka o‘qitiladi. “Yorqin kelajak” loyihasi doirasida kamida 200 nafar qiz har yili dunyoning nufuzli oliygohlariga o‘qishga yuboriladi”.

     7-mart kuni Chirchiq davlat pedagogika universitetida bo‘lib o‘tgan bayram tadbirida O‘zbekiston Respublikasi Prezidenti Shavkat Mirziyoyevning Xalqaro xotin-qizlar kuniga bag‘ishlangan tantanali marosimdagi nutqida yangragan ushbu fikrlar alohida ta’kidlandi. Davlatimiz rahbarining mamlakat xotin-qizlarini ilm va ta’lim sohasidagi ishlarni tubdan yangicha tashkil etishga qaratilgan tashabbuslari tadbir ishtirokchilari tomonidan keng qo‘llab-quvvatlandi.

     ChDPU rektori, professor G‘ofurjon Muxamedov universitet jamoasi tarkibida mehnat faoliyatini olib borayotgan ayollarga, bilim olayotgan talaba qizlarga fidokorona va samarador xizmatlari uchun minnatdorchilik bildirdi. Barchamiz uchun sevimli bo‘lgan buvijonu onajonlarimizni, mehribon opa-singillarimizni, dilbar ayollarimiz va munis qizlarimizni bayram bilan qutladi. 

     Universitetning barcha xotin-qizlariga gullar va rektor tabrik xatlari ulashildi.

     Bayram tantanasi teatr va san’at vakillari ishtirokida tashkil etilgan “Olam go‘zalligi Siz bilan ayol!” mavzusidagi madaniy tadbirga ulanib ketdi.

     Ayniqsa, “O‘zbekkonsert” davlat muassasasi  xonandasi Anvar G'aniyevning chiqishlari tadbir ishtirokchilariga manzur bo‘ldi.