2025-yil 16–17-iyun kunlari Chirchiq davlat pedagogika universitetida “Geografiya fanida tizimli yondashuv: nazariya, eksperiment, amaliyot va ta’lim” mavzusida xalqaro ilmiy-amaliy konferensiya bo‘lib o‘tdi. Ushbu nufuzli anjuman O‘zbekiston Respublikasi Prezidentining 2025-yil 30-yanvardagi PF-16-son farmoni bilan tasdiqlangan “O‘zbekiston – 2030” strategiyasini “Atrof-muhitni asrash va “yashil iqtisodiyot” yilida amalga oshirishga qaratilgan davlat dasturining ustuvor vazifalari bilan uzviy bog‘liq bo‘lib, geografiya fanining nazariy va amaliy asoslarini chuqur tahlil qilish, yangi ilmiy yondashuvlar asosida tajriba almashish hamda geografik tadqiqotlarda tizimli metodologiyani rivojlantirishga qaratilgan. Konferensiyada mamlakatimiz hamda xorijiy davlatlardan yetakchi geograf olimlar, professor-o‘qituvchilar, soha mutaxassislari va iqtidorli yosh tadqiqotchilar ishtirok etishdi.

     Konferensiyaning asosiy maqsadi geografiya fanida tizimli yondashuv doirasidagi dolzarb masalalarni, ilmiy natijalarni amaliyotga tatbiq etish hamda sohaning turli yo‘nalishlaridagi yutuqlar va muammolarni tahlil qilishdan iboratdir. Tadbir davomida ijtimoiy-iqtisodiy va ekologik muammolarni hal qilishda zamonaviy yondashuvlarning ahamiyati, GAT texnologiyalaridan yanada samarali foydalanish, kartografiya, gidrometeorologiya, geoekologiya singari yo‘nalishlar bo‘yicha dolzarb mavzular muhokama qilindi.

     Konferensiya doirasida tabiiy geografiyadagi tizimli yondashuvning nazariy masalalari, geoekologik tadqiqotlar va landshaftlar ekologiyasi, iqtisodiy va ijtimoiy geografiyaning bugungi kundagi roli, kartografik tahlillar va raqamli xaritalash texnologiyalari, suv resurslarini havzaviy boshqarish muammolari, tabiatni muhofaza qilish va barqaror rivojlanish strategiyalari, shuningdek, geografiya ta’limida olib borilayotgan zamonaviy tadqiqotlar alohida sessiyalar shaklida muhokama qilindi. Har bir yo‘nalish bo‘yicha nazariy qarashlar ilmiy muloqotlar asosida boyitilib, mavjud muammolar yechimi bo‘yicha amaliy takliflar bildirildi.

     Tadbir doirasida ishtirokchilar o‘z ilmiy izlanishlari natijalarini taqdim etdishdi. Ma’ruzalar, taqdimotlar, munozaralar va tajriba almashinuvi shaklidagi faoliyat konferensiyaning boy va samarali o‘tishini ta’minladi. Ta’lim va fan sohasida xalqaro hamkorlik aloqalarini mustahkamlash, iqtidorli yoshlarni ilmiy izlanishlarga keng jalb etish, fanlararo integratsiya va ilmiy yondashuvni kuchaytirish borasida muhim fikrlar bildirildi.

     Konferensiya materiallari asosida ilmiy maqolalar to‘plami nashr etilishi rejalashtirilgan bo‘lib, u geografiya fanining hozirgi holatini chuqur tahlil qilish, yangi ilmiy qarashlarni jamoatchilikka yetkazish va keyingi tadqiqotlar uchun muhim asos bo‘lib xizmat qiladi. Mazkur konferensiya ilmiy salohiyatni rivojlantirish, milliy va xalqaro darajadagi ilmiy hamkorlikni kengaytirish, shuningdek, geografiya fanining dolzarb muammolarini tizimli yondashuv asosida yechishda muhim ilmiy maydon bo‘lib xizmat qildi.